Астана. 25 мамыр. ИНТЕРФАКС-ҚАЗАҚСТАН — Қазақстан үкіметі Алматы облысындағы «Алатау» арнайы экономикалық аймағында толық циклді биофармацевтикалық кешен салу жобасын мақұлдады. Жобаның жалпы құны – 32,5 млрд теңге.
Тиісті қаулыға премьер-министр Олжас Бектенов қол қойды. Инвестициялық келісім Денсаулық сақтау министрлігі мен Steppe pharmaceuticals арасында жасалған.
Жаңа зауытта 20 түрлі дәрі-дәрмек өндіру жоспарланып отыр. Оның ішінде онкологиялық және сирек кездесетін ауруларға арналған препараттар, сондай-ақ заманауи иммунобиологиялық өнімдер болады.
Кәсіпорын 2031 жылы іске қосылады деп жоспарланған. 2032 жылы толық өндірістік қуатқа шығып, 2034 жылдан бастап негізгі бағыттар бойынша толық циклге өтеді.
Жоба аясында дәрі өндірумен қатар ғылыми-зерттеу және тәжірибелік-конструкторлық жұмыстар жүргізіледі. Сондай-ақ биоэквиваленттілік зерттеулері, халықаралық GMP стандарттарын енгізу және қазақстандық мамандарды оқыту жүйесі қарастырылған.
Үкіметтің мәліметінше, жоба шамамен 60 жаңа жұмыс орнын ашады және елдің дәрілік қауіпсіздігін күшейтуге мүмкіндік береді.
Қазір Қазақстанда фармацевтика саласында 8 ірі инвестициялық жоба жүзеге асырылып жатыр. Өткен жылы отандық фармацевтикалық өнім өндірісі 191,1 млрд теңгеге жетіп, 2024 жылмен салыстырғанда 8,7%-ға өскен.
