Астана. 28 мамыр. ИНТЕРФАКС-ҚАЗАҚСТАН – Қазақстандық FlyArystan лоукостері 3 қыркүйектен бастап Алматы – Үргеніш – Алматы бағыты бойынша тікелей рейстерді іске қосады. Бұл туралы әуе тасымалдаушының баспасөз қызметі хабарлады.
Рейстер аптасына екі рет – бейсенбі және жексенбі күндері орындалады.
Бір бағыттағы билет құны 41 мың теңгеден басталады.
«Үргеніш – Өзбекстанның солтүстік-батысындағы маңызды көлік торабы. Ол Хиуа және Нүкіс сияқты қалаларға ыңғайлы қатынауды қамтамасыз етеді. Жаңа рейстің ашылуы Орталық Азиядағы өңірлік бағыттар арасындағы маршруттық желіні жүйелі түрде дамытуға деген ұмтылысымызды көрсетеді», – делінген хабарламада авиакомпанияның президенті әрі бас атқарушы директоры Йохан Эйдхаген сөзінен.
Хабарламада рейстер мемлекеттік органдардың қажетті рұқсаттарын алған жағдайда Air Astana компаниясымен кодшерингтік келісім аясында орындалатыны атап өтілген.
Авиакомпания мәліметінше, жаңа бағыт жолаушыларға Алматы арқылы Қытай мен Оңтүстік Кореяға Air Astana рейстерімен әрі қарай ұшуға мүмкіндік береді.
Үргеніш – Өзбекстандағы Хорезм облысының әкімшілік орталығы. Қала Ичан-Кала тарихи кешені орналасқан Хиуаға баратын негізгі қақпа саналады. Хиуа ЮНЕСКО-ның Бүкіләлемдік мұралар тізіміне енгізілген.
