Астана. 11 маусым. ИНТЕРФАКС-ҚАЗАҚСТАН — Қазақстан Республикасы Парламентінің Сенаты бейсенбі күні өткен жалпы отырыста Мәжіліс бұрын қабылдаған «Қазақстан Республикасы Үкіметі мен Өзбекстан Республикасы Үкіметі арасындағы Қазақстан–Өзбекстан мемлекеттік шекарасының режимі туралы келісімді ратификациялау туралы» заңды мақұлдады.
Бұған дейін хабарланғандай, келісімнің негізгі мақсаты – екі елдің шекара маңындағы аумақтарында қолданылатын қағидаларды айқындау. Атап айтқанда, құжат мемлекеттік шекараны күтіп-ұстау, Қазақстан–Өзбекстан шекарасынан адамдар мен көлік құралдарының өтуі, сондай-ақ жүктер мен өзге де мүліктің тасымалдануы мәселелерін реттейді.
Келісімде сондай-ақ шекаралық белдеу мен шекара маңындағы суларда шаруашылық, кәсіпшілік және өзге де қызмет түрлерін жүзеге асыру тәртібі, оларды пайдалану қағидалары, мемлекеттік шекарада туындайтын оқиғаларды реттеу тетіктері, Қазақстан–Өзбекстан мемлекеттік шекарасы мен шекара маңындағы аумақтар үстінен ұшуларды жүзеге асыру тәртібі, сондай-ақ қоғамдық-саяси, мәдени және басқа да іс-шараларды өткізу мәселелері қарастырылған.
Келісімнің орындалуы халықаралық шарттар мен ұлттық заңнамаға сәйкес екі мемлекеттің бірлескен іс-қимылы арқылы қамтамасыз етіледі.
Заң Мемлекет басшысының қол қоюына жолданды.
