«Шагай по Алматы» арнасы хабарлайды: Threads әлеуметтік желісінде автобус жүргізушісінің жол үстінде тоқтап, көгершінді жолдың жүріс бөлігінен қауіпсіз жерге шығарып жатқан видеосы жарияланды. Бейнежазбаға қарағанда, қанаты жараланған құс ұшып кете алмаған. Жүргізуші көгершінге ақырын жақындап, қауіпсіз жерге апарған.
Еуразия24 пікірі:
Жақсы жаңалықтар да болып тұрады. Алматыдағы автобус жүргізушісі бейбітшіліктің символына айналған көгершінді құтқарып қалды. Бұл сирек кездесетін құс та емес, әрі барлық алматылықтар бірдей ұната қояды деу қиын, дегенмен жүргізуші оған көмектесуді жөн көрді. Негізі, мұны жасамауына да болар еді. Өйткені жүргізуші жұмыс барысында, белгіленген бағытта келе жатқан. Оның үстіне, Алматыдағы кептелістер жағдайында жүргізушілердің сабырын да, жанашырлығын да сақтау оңай емес. Алайда бұл жолы бәрі басқаша болды. Мейірімділік адам талғамайды — ол адам болмысында не бар, не жоқ. Сондықтан жанашыр аға келесі жолы да қиын жағдайға тап болған құсты немесе жануарды көрсе, қол ұшын созбай өтпес. Бұл оқиға жолаушылар үшін де үлкен ғибрат болды: кез келген тіршілік иесінің өмірі оны құтқаруға жұмсалған бірнеше минуттан әлдеқайда қымбат.
