Астана. 12 маусым. ИНТЕРФАКС-ҚАЗАҚСТАН – Қасым-Жомарт Тоқаев педагог мәртебесі, білім беру, денсаулық сақтау және бала құқықтарын қорғау мәселелері бойынша бірқатар заңнамалық актілерге өзгерістер мен толықтырулар енгізу туралы заңға, сондай-ақ педагог мәртебесіне қатысты Әкімшілік құқық бұзушылық туралы кодекске өзгерістер енгізу туралы ілеспе заңға қол қойды. Бұл туралы жұма күні Мемлекет басшысының баспасөз қызметі хабарлады.
Бұған дейін Сенат төрағасы Мәулен Әшімбаев аталған құжаттар педагогтардың құқықтары мен заңды мүдделерін қосымша қорғауды көздейтінін атап өткен болатын.
Сонымен қатар білім беру саласында Қазақстан аумағында тіркелген шетелдік жоғары оқу орындарының қызметін жетілдіруге бағытталған нормалар енгізілген. Ал денсаулық сақтау жүйесінде интернатура арқылы кадр даярлаудың ерекшеліктері мен шарттары айқындалған.
«Жалпы алғанда, бұл заңдар педагогтардың мәртебесін нығайтуға және жекелеген салалардағы мемлекеттік саясаттың тиімділігін арттыруға ықпал етеді деп сенеміз», – деген болатын Әшімбаев.
Заңға сәйкес, білім беру органдарына оқушылардың мектептерде ұялы телефондарды пайдалану қағидаларын әзірлеу және бекіту құзыреті беріледі.
Бұған дейін Сенаттың баспасөз қызметі хабарлағандай, сабақ кезінде мобильді құрылғылар дыбыссыз режимде болуы тиіс және мұғалімнің рұқсатынсыз пайдаланылмайды. Бақылау жұмыстары мен емтихандар кезінде мұғалімнің арнайы шешімі қарастырылған жекелеген жағдайларды қоспағанда, телефон қолдануға толық тыйым салынады.
Смартфондарды пайдалану тек білім беру мақсатында, яғни цифрлық платформалармен жұмыс істеу, жобалар әзірлеу және оқу тапсырмаларын орындау үшін ғана рұқсат етіледі.
Сонымен бірге педагогтар оқушылармен байланысты оқыс оқиғалар үшін тек жұмыс уақытында және оқыту мен тәрбиелеуге қатысты қызметтік міндеттерін атқару барысында ғана жауапты болады.
Бұдан бөлек, заңнамалық түзетулер педагогтан заңда көзделмеген артық есептілік пен ақпарат талап еткені үшін ескерту түріндегі әкімшілік жауапкершілікті енгізеді. Сондай-ақ педагогтерды құжаттарды бір мезгілде қағаз және электрондық форматта жүргізуге міндеттеу және мемлекеттік мектептер мен колледждердің мұғалімдерін жекеменшік ұйымдардың іс-шараларына тарту әрекеттері де әкімшілік құқық бұзушылық ретінде қарастырылады.
