Вашингтон. 23 маусым. ИНТЕРФАКС – Falcon 9 зымыран-тасығышы сейсенбі күні орбитаға орбитада өндірілген өнімдерді Жерге жеткізуге арналған тәжірибелік Starfall қайтарылатын жүк капсуласын алып ұшты. Бұл туралы жобаны әзірлеуші SpaceX компаниясы хабарлады.
Капсула салмағы бір тоннаға дейінгі пайдалы жүкті парашют жүйесінің көмегімен Жерге қайтарып, мұхитқа қондыру мүмкіндігін көрсетуі тиіс.
Зымыран ұшырылымы АҚШ Ғарыш күштерінің Флорида штатындағы Канаверал мүйісінде орналасқан 40-шы ұшыру кешенінен АҚШ-тың шығыс жағалауы уақыты бойынша 06:53-те (Мәскеу уақытымен 13:53-те) жүзеге асырылды.
Миссия басталғаннан шамамен үш сағат өткен соң, Жерді бір жарым рет айналып шыққан капсула зымыранның екінші сатысынан бөлініп, атмосфераның тығыз қабаттарына ене бастайды. Starfall капсуласы Калифорниядан батысқа қарай шамамен 965 шақырым қашықтықтағы Тынық мұхитына қонады деп күтілуде.
Starfall капсуласының басты ерекшелігі – оның дәстүрлі емес конструкциясы. Ол диаметрі шамамен 3,1 метр, ал биіктігі небәрі 0,75 метр болатын жалпақ диск пішінінде жасалған. Толық жабдықталған капсуланың салмағы 2 100 келіні құрайды, ал қайтарылатын жүктің көлемі 1 000 келіге дейін жетеді. Қолданыстағы жүйелермен салыстырғанда, Starfall жүк көтергіштігі жағынан 30 есе артық мүмкіндік ұсынады.
АҚШ-тың Федералдық азаматтық авиация басқармасының (FAA) құжаттарына сәйкес, капсуланы қолданудың негізгі бағыттарының бірі – орбиталық өндіріс. Оның ішінде Жердегі тартылыс жағдайында өндіру мүмкін емес фармацевтикалық препараттар, ақуыз кристалдары, жартылай өткізгіш материалдар мен жетілдірілген оптикалық талшықтар бар.
Сонымен қатар Пентагонмен Starfall капсуласын әскери қақтығыс аймақтарына немесе әскери қолдау қажет өңірлерге аса маңызды жүктер мен жабдықтарды әлемнің кез келген нүктесіне жедел жеткізу мақсатында пайдалану мәселесі талқыланып жатыр.
Егер алғашқы сынақ сәтті өтсе, компания FAA-дан сынақтардың екінші кезеңін өткізуге рұқсат алады. Ал екі демонстрациялық миссия да табысты аяқталған жағдайда, SpaceX Starfall жүйесін коммерциялық қызмет ретінде ұсына бастайды.
