Брюссель. 24 маусым. ИНТЕРФАКС – Еуропалық комиссия (ЕК) қылмыстың барған сайын күрделеніп, халықаралық әрі цифрлық сипат алып отырған жағдайында Еуроодақтың оған қарсы әрекет ету мүмкіндіктерін күшейтуге бағытталған жаңа шараларды ұсынды.
«Қылмыстық топтар цифрлық кеңістіктің мүмкіндіктерін өте шебер пайдаланып, шекаралық шектеулерге қарамастан еркін әрекет етуде. Бүгін ұсынылған бастамалар Еуропол мен Еуроюсттың әлеуетін күшейтіп, Еуропаға, соның ішінде интернеттегі қылмыстармен күресте, жедел әрекет етуге, ақпарат алмасуды тиімді ұйымдастыруға және құқық бұзушыларды жауапкершілікке тезірек тартуға мүмкіндік береді», – деді Еурокомиссия төрағасының атқарушы орынбасары Хенна Вирккунен.
Оның пікірінше, Еуропол мен Еуроюстқа қатысты бұл реформалар қауіпсіздік саласындағы күрделі әрі жылдам өзгеріп жатқан жағдайларда Еуроодақтың өз азаматтарын қорғау мүмкіндігін арттырады.
Брюссельдің мәліметінше, Еуропол мен Еуроюст ұйымдасқан қылмыстық желілерге, террористік топтарға және шекарааралық, жаһандық әрі интернет кеңістігінде әрекет ететін өзге де қауіп көздеріне қарсы күресте маңызды рөл атқарады. Мұндай құрылымдар жасанды интеллект мүмкіндіктерін де барған сайын жиі пайдалануда.
Еурокомиссияның пайымдауынша, ауыр қылмыстармен тиімді күресу үшін полиция, кеден қызметі, прокуратура және сот органдары тергеудің алғашқы кезеңінен бастап түпкілікті сот шешімі шыққанға дейін тығыз ынтымақтастықта жұмыс істеуі қажет.
Еурокомиссия таратқан мәлімдемеде ұсынылған заңнамалық өзгерістердің қылмыстың алдын алу, анықтау және тергеуден бастап, сот саласындағы өзара іс-қимыл мен құқық бұзушыларды қудалауға дейінгі барлық бағыттарды қамтитыны айтылған.
Пакет аясында Еуропол мен Еуроюст өкілеттіктерін кеңейтуге арналған екі регламент, Еуропалық тергеу туралы ордерді қайта қарау және ЕО институттары мен органдарындағы деректерді қорғау туралы регламентке түзетулер енгізу көзделген.
Жаңа ережелердің арқасында Еуропол Еуроодақ елдеріне ақпарат алмасуды анағұрлым тиімді әрі қауіпсіз ұйымдастыруға қолдау көрсете алады. Сонымен қатар құқық қорғау органдарының қажеттіліктерін кешенді бағалайтын және ЕО елдерінің бірлескен зерттеулер мен әзірлемелерге инвестиция салуын қолдайтын технологиялар мен инновациялар орталығын құру жоспарланып отыр.
Жаңартылған мандат Еуроюсттың ұлттық органдарға көрсететін көмегін де едәуір кеңейтпек. Атап айтқанда, агенттік киберқылмыс, ЕО санкциялық режимдерін бұзу және гендерлік сипаттағы зорлық-зомбылық сияқты жаңа қылмыс түрлерімен күресте мүше мемлекеттерге жәрдем көрсете алады.
Еуропол – Еуроодақтың полиция саласындағы агенттігі. Ол тергеу жұмыстарын үйлестірумен және ақпарат алмасумен айналысады. Ал Еуроюст – прокурорлар мен судьяларға трансшекаралық істер бойынша қолдау көрсететін сот саласындағы агенттік.
