Астана. 26 маусым. ИНТЕРФАКС-ҚАЗАҚСТАН – Қазақстан 2027 жылдың алғашқы жартысында Павлодар облысының Екібастұз қаласында қуаты 125 МВт болатын деректерді өңдеу орталығын (ДӨО) пайдалануға береді. Бұл туралы Премьер-министр Олжас Бектенов жұма күні Парламент палаталарының бірлескен отырысында мәлімдеді.
«Қазір Екібастұзда деректерді өңдеу орталығы салынып жатыр. Келесі жылдың алғашқы жартысында қуаты 125 МВт болатын орталықты іске қосамыз. Ал 2028 жылы дәл осындай қуаттағы тағы бір ДӨО пайдалануға беріледі», – деді Үкімет басшысы.
Оның айтуынша, бұл жоба Павлодар облысында жүзеге асырылып жатқан «ДӨО алқабы» (Data Center Valley) бастамасының бір бөлігі болып табылады.
Премьердің мәліметінше, қазіргі уақытта Қазақстанның мемлекеттік органдарының ақпараттық жүйелері Астанада орналасқан қуаты 6 МВт болатын жалғыз деректерді өңдеу орталығында жұмыс істейді.
Сондай-ақ Олжас Бектенов 2025 жылы Қазақстанның IT қызметтерінің экспорты 2024 жылмен салыстырғанда 60 пайызға өсіп, 1,1 млрд АҚШ долларына жеткенін еске салды.
Бұған дейін Павлодар облысындағы «ДӨО алқабы» жобасы бойынша толық ауқымды құрылыс жұмыстары маусым айында басталатыны хабарланған болатын.
Жоба Екібастұз қаласында іске асырылып жатыр. Оның аясында энергетикалық әлеуеті 1 ГВт-қа дейін жететін Орталық Азиядағы ең ірі дата-орталықтар кампусын құру жоспарланған. Бұл мақсатқа жалпы аумағы 1,4 мың гектар жер бөлінген.
Қазақстан «ДӨО алқабы» жобасын америкалық Firebird компаниясымен бірлесіп жүзеге асыруда. Компанияның негізгі серіктестерінің бірі – жасанды интеллект пен жоғары өнімді есептеу технологиялары саласындағы әлемдік көшбасшы NVIDIA.
Жоба бойынша жасалған келісімдердің жалпы әлеуеті 10 млрд АҚШ долларына бағаланып отыр.
Жобаны толық іске асыру нәтижесінде жыл сайын кемінде 3 млрд АҚШ доллары көлемінде экспорттық табыс түседі, жаңа жұмыс орындары ашылады, әлемдік технологиялық компаниялар тартылады және Қазақстанның Еуразиядағы жетекші цифрлық хабтардың бірі ретіндегі позициясы нығаяды.
Firebird компаниясы жасанды интеллект инфрақұрылымын, деректерді өңдеу орталықтарын және жоғары өнімді есептеу жүйелерін дамытуға маманданған. Компания әлемнің түрлі өңірлерінде жобаларды жүзеге асырып, NVIDIA бастаған жетекші технологиялық серіктестермен жұмыс істейді. Оның шешімдері әлемдегі көптеген суперкомпьютерлер мен деректерді өңдеу орталықтарында қолданылып, қазіргі заманғы генеративті жасанды интеллект модельдерінің елеулі бөлігінің негізін құрайды.
