Астана. 27 маусым. ИНТЕРФАКС-ҚАЗАҚСТАН – China Pingmei Shenma Holding Group Co., Ltd. Қазақстанда көмір химиясы кешенін салу жобасына 1,5 млрд АҚШ долларына дейін инвестиция салу мүмкіндігін қарастырып жатыр. Бұл туралы Қазақстан үкіметінің баспасөз қызметі хабарлады.
Хабарламаға сәйкес, жоба көмірді терең өңдеудің толық өндірістік циклін құрып, қосылған құны жоғары өнім шығаруды көздейді. Бұл мәселе Премьер-министрдің орынбасары – Ұлттық экономика министрі Серік Жұманғариннің Үрімжі қаласында қытайлық холдинг басшылығымен өткізген келіссөздерінің қорытындысында талқыланды.
Серік Жұманғарин қытайлық тарапты жуық арада Қазақстанға келуге шақырды.
«Біз көмір химиясы саласындағы жобаларды белсенді қолдаймыз. Жобаны жан-жақты сүйемелдеуге, сондай-ақ “Бәйтерек” холдингімен және Қазақстанның Даму банкімен бірлесіп қаржыландыру тетіктерін пысықтауға дайынбыз. Абай облысы да ынтымақтастыққа ашық және жобаны жүзеге асыру үшін өндірістік алаңдар ұсына алады», – деді вице-премьер.
Келіссөз қорытындысы бойынша China Pingmei Shenma Holding Group пен QazTrade сауда саясатын дамыту орталығы көмір ресурстарын игеру және Қазақстандағы көмір химиясы өнеркәсібін дамыту саласындағы стратегиялық ынтымақтастық туралы меморандумға қол қойды.
China Pingmei Shenma Holding Group Co., Ltd. – көмір өндіру, көмір химиясы және жаңа материалдар өндірісі бағытында жұмыс істейтін Қытайдағы ірі өнеркәсіптік холдингтердің бірі.
