Дубай. 28 маусым. ИНТЕРФАКС – Ормуз бұғазындағы кеме қатынасын қалыпты режимге қайтару жауапкершілігі толықтай Иранға жүктелген. Ал кез келген сыртқы араласу бұл үдерісті тек кешеуілдетеді. Бұл туралы жексенбі күні Иранның Сыртқы істер министрі Аббас Аракчи мәлімдеді.
«Өзара түсіністік туралы меморандумға сәйкес, Ормуз бұғазы Иранның басқаруында болады және 30 күннен кейін ондағы кеме қатынасы қалыпты режимге қайта оралады. Бұл үшін жауапкершілік тек Иранға тиесілі, ешбір басқа мемлекетке емес», – деді Аракчи Бағдадта Ирактың Сыртқы істер министрі Фуад Хусейнмен өткізген бірлескен баспасөз мәслихатында.
Иран сыртқы саяси ведомствосының басшысы кез келген араласу немесе қосымша шаралар жағдайды одан әрі күрделендіріп, Ормуз бұғазының қайта ашылуын кешеуілдететінін айтты.
«Кез келген араласу немесе қосымша жаңа шаралар жағдайды одан әрі ушықтырып, Ормуз бұғазының ашылуын кешеуілдетеді. Соңғы екі түнде болған оқиғалар соның айқын дәлелі», – деді Аракчи.
Соңғы екі түнде АҚШ Иран аумағына қайтадан соққы жасады. Бұған жауап ретінде Иран көрші мемлекеттердегі АҚШ-тың сегіз маңызды нысанына, соның ішінде Кувейттегі «Али әл-Салем» әскери-әуе базасына және Бахрейндегі Салман портында орналасқан АҚШ Әскери-теңіз күштерінің Бесінші флотының штаб-пәтеріне соққы берген.
