Астана. 29 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Грузияның премьер-министрі Ираклий Кобахидзені І дәрежелі «Достық» орденімен марапаттады. Бұл туралы Ақорданың баспасөз қызметі хабарлады.
Марапаттау рәсімінде сөйлеген сөзінде Мемлекет басшысы Ираклий Кобахидзені Қазақстанның досы, көреген көшбасшы әрі өз ісіне адал мемлекет қайраткері деп атады.
«Сіздің табанды басшылығыңыздың арқасында Грузия ауқымды әлеуметтік-экономикалық реформаларды табысты жүзеге асырып, азаматтарының әл-ауқатын арттырып келеді. Сонымен қатар халықаралық беделін нығайтып, өңірдегі маңызды серіктес ретіндегі ұстанымын күшейтуде. Грузия алдағы уақытта да орнықты даму жолымен ілгерілеп, қуатты әрі өркендеген мемлекет ретінде жаңа белестерді бағындырады деп сенемін», – деді Қазақстан Президенті.
Сондай-ақ Қасым-Жомарт Тоқаев Қазақстан мен Грузия арасындағы тарихи тамыры терең, ортақ мәдени құндылықтар мен ғасырлар бойы қалыптасқан достық және өзара түсіністікке негізделген қарым-қатынастың қазіргі деңгейіне жоғары баға берді.
«Қазақ халқы грузин халқының бай тарихы мен бірегей мәдениетіне ерекше құрметпен қарайды. Қазақстандағы грузин этномәдени қауымдастығы көпэтносты қоғамымыздың ажырамас бөлігі әрі екі ел арасындағы өзіндік алтын көпірге айналды. Соңғы жылдары екіжақты байланыстар жаңа серпін алды: саяси диалог жанданып, өзара сауда тұрақты өсіп келеді, ал экономикалық ынтымақтастық түрлі салаларда кеңейіп жатыр. Қазақстан мен Грузия халықаралық аренада да тиімді ынтымақтастық орнатып, маңызды халықаралық мәселелер бойынша бір-бірін дәйекті түрде қолдап келеді», – деді Мемлекет басшысы.
Өз кезегінде Ираклий Кобахидзе оның қызметіне жоғары баға бергені үшін Қасым-Жомарт Тоқаевқа алғыс айтты.
Грузия премьер-министрі Астанаға ресми сапармен келді.
