Астана. 29 маусым. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев пен Грузияның премьер-министрі Ираклий Кобахидзе Қазақстан Республикасы мен Грузия арасында стратегиялық әріптестік орнату туралы бірлескен мәлімдеме қабылдады. Бұл туралы Ақорданың баспасөз қызметі хабарлады.
«Келіссөздер қорытындысы бойынша Қасым-Жомарт Тоқаев пен Ираклий Кобахидзе Қазақстан Республикасы мен Грузия арасында стратегиялық әріптестік орнату туралы бірлескен мәлімдеме қабылдады», – делінген хабарламада.
Сонымен қатар ресми делегациялар мүшелері мәдениет, цифрлық даму және туризм салаларындағы ынтымақтастық туралы меморандумдармен алмасты.
Атап айтқанда, екі елдің мәдениет министрліктері мәдениет саласындағы ынтымақтастық туралы меморандумға қол қойды.
Сондай-ақ Қазақстанның Жасанды интеллект және цифрлық даму министрлігі мен Грузияның Экономика және орнықты даму министрлігі өзара ынтымақтастық туралы меморандум жасасты.
Бұдан бөлек, Қазақстанның Туризм және спорт министрлігі мен Грузияның Экономика және орнықты даму министрлігі туризм саласындағы ынтымақтастық туралы меморандумға қол қойды.
