Астана. 29 маусым. ИНТЕРФАКС-ҚАЗАҚСТАН – Қазақстан парламенті сенатының депутаттары дүйсенбі күні өткен жалпы отырыста Қазақстан мен Қырғызстан үкіметтері арасындағы Астана және Бішкек қалаларында екі елдің елшіліктері мен елшілердің резиденцияларына арналған ғимараттар мен жер телімдерін өзара өтеусіз пайдалануға беру туралы келісімді ратификациялау туралы заңды мақұлдады.
Бұған дейін заңды мәжіліс қабылдаған болатын. Осылайша құжат парламентте түпкілікті қабылданып, енді мемлекет басшысының қол қоюына жіберіледі.
Келісімге 2025 жылғы 22 тамызда Бішкек қаласында қол қойылған.
Құжатқа сәйкес, Астана мен Бішкек қалаларындағы ғимараттар мен жер телімдері 49 жыл мерзімге, кейін ұзарту құқығымен өтеусіз пайдалануға беріледі.
Қазақстанның Бішкектегі елшілігіне көлемі 0,75 гектар жер телімі, ал Қазақстан елшісінің резиденциясы үшін жалпы аумағы 531,66 шаршы метр коттедж және оған іргелес 0,17 гектар жер бөлінеді.
Өз кезегінде Қырғызстанның Астанадағы елшілігіне көлемі 0,74 гектар жер телімі, ал Қырғызстан елшісінің резиденциясы үшін жалпы аумағы 1267,8 шаршы метр коттедж және оған іргелес 0,125 гектар жер беріледі.
Сонымен қатар аталған жылжымайтын мүлік екі мемлекетте де барлық салықтар мен алымдардан босатылады. Ғимараттарды салуға, жөндеуге, күтіп-ұстауға және коммуналдық қызметтерге жұмсалатын шығындарды тараптар қабылдаушы мемлекетте қолданылатын тарифтерге сәйкес өздері өтейді.
