Астана. 1 шілде. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев ел азаматтарын жаңа Конституцияның күшіне енуімен құттықтады.
«Баршаңызды еліміздің жаңа Конституциясының күшіне енуі сынды шын мәнінде тарихи маңызы зор оқиғамен шын жүректен құттықтаймын!» – деді Мемлекет басшысы отандастарына арнаған үндеуінде. Үндеу мәтінін сәрсенбі күні Президенттің баспасөз қызметі жариялады.
«Бүгін егемен Қазақстанның тарихындағы жаңа дәуір басталады. Еліміз тұрақты даму, саяси және экономикалық реформалар, ауқымды жаңғыру жолына қадам басып отыр. Бұл күн саяси жүйенің түбегейлі жаңаруын, мемлекеттік және азаматтық институттардың жаңаша қалыптасуын айшықтайды», – деді Президент.
Мемлекет басшысы 15 наурызда өткен жалпыұлттық референдумда Қазақстан халқы «мемлекеттің алдағы ондаған жылдағы даму бағытын айқындаған тарихи таңдау жасағанын» атап өтті.
«Бұл тарихи шешім миллиондаған отандасымыздың шынайы отаншылдығы мен жоғары азаматтық жауапкершілігінің жарқын көрінісі ретінде ел шежіресінде мәңгі сақталады», – деді Қасым-Жомарт Тоқаев.
«Халықтың қалауымен қабылданған Конституцияның берік құқықтық негізіне сүйене отырып, алдымызға қойған барлық мақсатқа қол жеткізетінімізге сенімдімін. Сондай-ақ қоғамда Заң мен Тәртіп, Еңбекқорлық пен Прогресс, Тазалық пен Табиғатты аялау құндылықтарын орнықтырамыз деп сенемін», – деді Президент.
Қазақстанның жаңа Конституциясы 1 шілдеден бастап күшіне енді.
