Дели. 12 қазан. ИНТЕРФАКС – Үндістандағы оппозициялық жастар қозғалысы – «Тарақандар халық партиясының» белсенділері дүйсенбі күні Дели полициясынан наразылық шеруін өткізуге нақты күн мен уақыт белгілеуді талап етті. Олар полицияға жауап беру үшін 24 сағат мерзім берді. Бұл туралы Times of India басылымы хабарлады.
«Полиция шерудің өтетін күнін белгілейді деп үміттенеміз. Әйтпесе бір тәуліктің ішінде басқа шешім қабылдаймыз. Бұл мәселені созбалаңға салуға жол бермейміз», – деп келтіреді басылым белсенділердің бірінің сөзін.
Сенбі күні Делиде «Тарақандар халық партиясының» наразылық шеруін тоқтату үшін полиция жүргізген операция кезінде екі тәртіп сақшысы мен бірнеше шеруші жарақат алды. Қаланың әр ауданында шамамен 5 мың адам ұсталды. Олардың арасында оппозицияның белгілі өкілдері де бар.
Үндістан полициясы сенбі күні ел астанасында кез келген бұқаралық шара өткізуге тыйым салған болатын.
Қазір де Дели көшелерінде 30 мыңнан астам полиция қызметкері патрульде жүр.
Бұған дейін «Тарақандар халық партиясының» жетекшісі Абхиджит Дипке мен оның екі серігі ұсталғаны хабарланған. Олар Дели әуежайына ұшып келген бойда, ұшақ ішінде қамауға алынған.
Бұған дейін аталған қозғалыс Үндістанның Орталық сайлау комиссиясының басшысы Гьянеш Кумар қызметінен кетпесе, бүкіл ел көлемінде наразылық шерулерін ұйымдастыратынын ескерткен еді.
Оппозициялық партиялар сайлау комиссиясын біржақтылық танытты деп айыптап отыр. Олардың мәлімдеуінше, сайлаушылар тізіміне Премьер-министр Нарендра Модидің «Үндістан халық партиясының» сайлауда жеңіске жетуіне жағдай жасау үшін өзгерістер енгізілген.
Ал Үндістанның сайлау комиссиясы кез келген мекемеде шешім қабылдау кезінде түрлі пікірдің болуы қалыпты жағдай екенін мәлімдеді.
Өз кезегінде Модидің партиясы сайлау комиссиясын қорғап, оппозиция сайлауда үнемі жеңіліп жүргендіктен, оның беделіне нұқсан келтіру науқанын бастағанын айтты.
