Астана. 4 шілде. ИНТЕРФАКС-ҚАЗАҚСТАН – Қазақстанның ішкі жанар-жағармай нарығындағы жағдай тұрақты, ал отандық мұнай өңдеу зауыттары жоспарлы режимде жұмыс істеп жатыр. Бұл туралы Энергетика министрі Ерлан Ақкенженов сенбі күні премьер-министр Олжас Бектеновтің төрағалығымен өткен кеңесте мәлімдеді.
Үкіметтің баспасөз қызметінің хабарлауынша, министр елдегі жанар-жағармай нарығындағы ахуалдың тұрақты екенін баяндады.
«Қазақстанның мұнай өңдеу зауыттары жоспарлы режимде жұмыс істеп тұр. Елдегі бензин, дизель отыны және авиаотын қоры ішкі нарықтың қажеттілігін толық қамтамасыз етеді. Энергетика министрлігі жанар-жағармай өндірісі мен жеткізілуін тұрақты бақылауда ұстап отыр», – делінген кеңес қорытындысы бойынша таратылған хабарламада.
Сонымен қатар Ішкі істер министрі Ержан Сәденов жыл басынан бері автомобиль өткізу бекеттерінде мұнай өнімдерін заңсыз әкетудің жалпы көлемі 40 мың литрден асатын 593 әрекетінің жолы кесілгенін айтты. Мұнай өнімдерін заңсыз шығаруға жол бермеу жөніндегі жол картасы аясында шекара маңындағы аудандарда бақылау күшейтіліп, тереңдетілген тексерулер жүргізу үшін қызметкерлер саны арттырылған.
Қаржы вице-министрі Ержан Біржанов соңғы екі тәулікте өткізу бекеттерінде қосымша бактар мен канистрлерде үш тоннадан астам жанар-жағармайды заңсыз әкетуге бағытталған 61 әрекеттің тоқтатылғанын хабарлады.
Бұдан бөлек, мемлекеттік кірістер органдары қызмет көлемінің қалыптан тыс өсуі тіркелген 62 жанармай құю станциясы мен 22 шағын мұнай өңдеу зауытының қызметіне талдау жүргізіп жатыр. Аталған нысандарда тексерулер ұйымдастырылады.
Кеңес қорытындысында премьер-министр Олжас Бектенов мұнай өнімдерінің ішкі нарығындағы тұрақтылықты қамтамасыз ету үкіметтің басым міндеттерінің бірі екенін атап өтті. Ол мемлекеттік органдарға жағдайды күн сайын бақылауда ұстауды тапсырды.
