Астана. 4 шілде. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев АҚШ-пен кеңейтілген стратегиялық әріптестікті одан әрі нығайтуға дайын екенін растады. Бұл туралы Ақорданың баспасөз қызметі хабарлады.
АҚШ президенті Дональд Трампқа ел тәуелсіздігінің 250 жылдығына орай жолдаған құттықтау жеделхатында Тоқаев Трамптың Қазақстан мен АҚШ арасындағы қарым-қатынастың қарқынды дамуына қосқан жеке үлесін атап өтіп, кеңейтілген стратегиялық әріптестікті одан әрі нығайтуға дайын екенін білдірді.
Мемлекет басшысы бұл күннің тарихи маңызына ерекше тоқталып, оны Америка халқының еркіндік, теңдік және әділеттілік қағидаттарына адалдығының символы деп атады.
Сондай-ақ Қасым-Жомарт Тоқаев Дональд Трампқа мемлекеттік қызметінде табыс, ал АҚШ халқына бақ-береке мен өсіп-өркендеу тіледі.
