Астана. 4 шілде. ИНТЕРФАКС-ҚАЗАҚСТАН – Respublica партиясының съезі партия төрағасы Айдарбек Қожаназаровтың өкілеттігін үш жылға ұзарту туралы шешім қабылдады. Бұл туралы «Интерфакс-Қазақстан» агенттігінің тілшісі хабарлады.
Айдарбек Қожаназаровтың кандидатурасын 592 делегат қолдады, бір делегат қалыс қалды. Қолданыстағы төрағаның өкілеттік мерзімі 2026 жылғы 29 шілдеде аяқталуы тиіс болатын.
Партияның ішкі рәсімдеріне сәйкес, төраға партияның тең төрағалары қатарынан орталық кеңестің ұсынуымен сайланып, съезде ашық дауыс беру арқылы үш жыл мерзімге бекітіледі. Осы мерзім аяқталғаннан кейін партия басшысының өкілеттігі съезд жаңа төрағаны сайлағанға дейін сақталады немесе келесі мерзімге ұзартылады.
Съезд барысында делегаттар партияның атқарған жұмысын қорытындылап, жарғыға өзгерістер енгізеді. Түзетулер өңірлік филиалдар төрағаларын тағайындау және қызметінен босату рәсімдерін орталықтандыруды көздейді.
Сонымен қатар басқару органдарының өкілеттіктері нақтыланып, қайталанатын функциялар жойылады. Сондай-ақ кадрлық рәсімдерді орталықтандыру және басқару тиімділігін арттыруға бағытталған өзгерістер енгізіледі.
Съезде Respublica партиясының сайлауалды бағдарламасы бекітіліп, бақылау-тексеру комиссиясының құрамы жаңартылады және Құрылтай сайлауына қатысатын партиялық кандидаттар тізімі мақұлданады.
Тізім негізінен партия белсенділерінен, кадр резервінің мүшелерінен, партияның білім беру бағдарламаларының түлектерінен, мәжіліс пен барлық деңгейдегі мәслихат депутаттарынан, сондай-ақ жергілікті атқарушы органдардың өкілдерінен жасақталған.
Қазақстанда Құрылтай сайлауы 23 тамызға белгіленген.
