Астана. 7 шілде. ИНТЕРФАКС-ҚАЗАҚСТАН – Қазақстанда 2026 жылдың қорытындысы бойынша 64,5 млрд текше метр газ өндіру жоспарланып отыр. Бұл туралы Энергетика министрі Ерлан Ақкенженовтің Үкімет отырысында таныстырған презентациясында айтылғанын «Интерфакс-Қазақстан» агенттігінің тілшісі хабарлады.
Презентацияға сәйкес, 2026 жылға арналған жоспарлы көрсеткіш – 64,5 млрд текше метр.
2025 жылы Қазақстанда 68,2 млрд текше метр газ өндірілген. Осылайша, биылғы жылы газ өндіру көлемі өткен жылмен салыстырғанда 5,4%-ға төмендейді деп күтілуде.
Энергетика министрлігінің мәліметінше, 2026 жылдың алғашқы бес айында нақты өндірілген газ көлемі 25,9 млрд текше метрді құрады.
Есепті кезеңде тауарлық газ өндірісі 10 млрд текше метр болды. Жыл қорытындысында бұл көрсеткішті 27,4 млрд текше метрге жеткізу жоспарланған. Бұл 2025 жылғы өндіріс көлемімен бірдей.
Сұйытылған газ өндірісі алғашқы бес айда 850 мың тоннаны құрады. Жыл соңына дейін оны 3 млн тоннаға жеткізу көзделген. Бұл да 2025 жылғы деңгейге сәйкес келеді.
Энергетика министрлігінің жоспарына сәйкес, 2026 жылы тауарлық газды тұтыну 4,6%-ға өсіп, 22,6 млрд текше метрге жетеді. 2025 жылы бұл көрсеткіш 21,6 млрд текше метр болған. Ал биылғы жылдың алғашқы бес айында тауарлық газ тұтыну көлемі 10,9 млрд текше метрді құрады.
