Астана. 7 шілде. ИНТЕРФАКС-ҚАЗАҚСТАН – Қашаған кен орнындағы жылдық қуаты 2,5 млрд текше метр болатын екінші газ өңдеу зауытын (ГӨЗ) және Қарашығанақтағы жылдық қуаты 5 млрд текше метр болатын газ өңдеу зауытын 2030 жылға дейін пайдалануға беру жоспарланып отыр. Бұл туралы Қазақстанның Энергетика министрі Ерлан Ақкенженов Үкімет отырысында мәлімдеді.
«2030 жылға қарай Қашаған кен орнында жылына 2,5 млрд текше метр газ өңдейтін газ өңдеу зауытын, сондай-ақ Қарашығанақта жылына 5 млрд текше метр газ өңдейтін газ өңдеу зауытын іске қосу көзделіп отыр. Бұл жобалар газ өңдеу көлемін ұлғайтуға, газ тасымалдау инфрақұрылымын кеңейтуге және өңірлерді тұрақты газбен қамтамасыз етуге мүмкіндік береді», – деді Ақкенженов.
Министрдің айтуынша, 2027 жылы Қашағандағы жылдық қуаты 1 млрд текше метр болатын газ өңдеу зауыты мен Жаңаөзендегі жылдық қуаты 0,9 млрд текше метр болатын ҚазГӨЗ-ді пайдалануға беру жоспарланған.
Еске салсақ, Қашаған кен орнында жылына 2,5 млрд текше метр газ өңдейтін екінші газ өңдеу зауытын салу жобасының EPC-мердігері ретінде China National Chemical Engineering Sixth Construction Company Kazakhstan Branch және China Wuhuan Engineering Corporation Ltd. компанияларынан құралған консорциум анықталған.
Ал Қашағандағы жылдық қуаты 1 млрд текше метр болатын алғашқы газ өңдеу зауытының құрылысын қазіргі уақытта QazaqGaz ұлттық компаниясы жүргізіп жатыр.
Қарашығанақтағы газ өңдеу зауытының EPC-мердігері ретінде бұған дейін Hyundai Engineering Co., Ltd. және SICIM Kazakhstan LLP компанияларынан құралған консорциум белгіленген.
