Астана. 8 шілде. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев «Қазақстан Республикасының кейбір заңнамалық актілеріне әлеуметтік заңнаманы жетілдіру мәселелері бойынша өзгерістер мен толықтырулар енгізу туралы» заңға қол қойды.
Құжаттың мәтіні сәрсенбі күні ресми бұқаралық ақпарат құралдарында жарияланды.
Заңның негізгі нормалары техникалық және кәсіптік білім беру жүйесін, кәсіби біліктіліктерді жетілдіруге, сондай-ақ көші-қон саясатын реттеуге бағытталған.
Заңды қарау барысында халықтың санитариялық-эпидемиологиялық саламаттылығы мен қауіпсіздігін қамтамасыз етуге қатысты қосымша нормалар да енгізілді. Сонымен қатар елде қолданылатын медициналық газдарды құқықтық реттеу мақсатында «медициналық газ» ұғымы енгізіліп, оны мемлекеттік тіркеу талаптары және медициналық емес мақсатта пайдалануға тыйым салу көзделді.
Түзетулердің тағы бір блогы белсенді ұзақ өмір сүру орталықтарының қызмет тәртібін заңнамалық деңгейде айқындайды. Сондай-ақ салымшының өтініші бойынша зейнетақы жинақтарын инвестициялық портфельді басқарушының инвестициялық басқаруына беру тәртібі нақтыланды.
Бұдан бөлек, мүгедектігі бар адамдарды жұмысқа орналастыруға арналған жұмыс орындары квотасын белгілеу, оның орындалуын мониторингтеу және бағалау қағидалары бекітілді. Сондай-ақ субсидияланатын жұмыс орындарына қатысушылардың жалақысының мемлекет субсидиялайтын бөлігін Еңбек мобильділігі орталықтары арқылы төлеу тетігі енгізіледі.
