Астана. 16 шілде. INTERFAX-ҚАЗАҚСТАН – Президент Қасым-Жомарт Тоқаев Қазақстанның Қытайдың бастамаларын қолдауға дайын екенін мәлімдеп, Си Цзиньпинмен мәңгілік жан-жақты стратегиялық әріптестікті одан әрі нығайтуға мүдделі екенін растады.
«Біз Сіздің игі бастамаларыңызды әрдайым қолдауға дайынбыз. Қазақстан Қытаймен мәңгілік жан-жақты стратегиялық әріптестікті жан-жақты нығайтуға әрдайым мүдделі», – деді Тоқаев Шанхайда ҚХР Төрағасымен өткен келіссөз барысында.
Президенттің сөзін Ақорда баспасөз қызметі келтірді.
Мемлекет басшысы Қытайдың халықаралық беделі жоғары екенін атап өтіп, елдің қол жеткізген жетістіктері әлемдік қауымдастық тарапынан мойындалғанын айтты. Оның сөзінше, соңғы жылдары Қазақстан мен Қытай арасындағы саяси диалог едәуір жанданып, халықаралық аренадағы өзара іс-қимыл жоғары деңгейде жалғасып келеді.
Президент сондай-ақ Қазақстан мен Қытайдың жаһандық орнықты даму және қауіпсіздікті қамтамасыз ету мәселелерінде ұқсас ұстанымдарды бөлісетінін айтты. Екі ел Біріккен Ұлттар Ұйымы, Шанхай ынтымақтастық ұйымы, Азиядағы өзара іс-қимыл және сенім шаралары жөніндегі кеңес және «Орталық Азия – Қытай» форматында тиімді ынтымақтастық орнатып келеді.
Өз кезегінде Си Цзиньпин Қытай мен Қазақстан арасындағы мәңгілік жан-жақты стратегиялық әріптестік қатынастары жоғары деңгейге көтерілгенін және олардың одан әрі дамуына зор мүмкіндік бар екенін мәлімдеді.
