Informburo хабарлайды: «Қазақстанда әуе тасымалы қағидаларына өзгерістер енгізілмек. Олар жолаушылардың құқықтарын қорғауды күшейтуге бағытталған. Көлік министрлігі әзірлеген түзетулердің жобасы 27 шілдеге дейін қоғамдық талқылау үшін «Ашық НҚА» порталында жарияланды.
Негізгі өзгерістер:
Әуе кемесі ауыстырылған жағдайда басымдық беру. Егер әуе компаниясы сыйымдылығы төмен әуе кемесін пайдаланса, алдымен балаларға, жүкті әйелдерге, мүгедектігі бар адамдарға, ауыр науқас жолаушыларға және зейнеткерлерге орын беріледі.
Домбыра мен қобызды тасымалдау. Өлшемі 110×35×30 см-ден, салмағы 10 келіден аспайтын музыкалық аспаптарды қорғаныш қаптамасында қол жүгінің құрамында ұшақ салонында алып жүруге рұқсат етіледі.
Өтемақы төлеу. Багажды жеткізуді кешіктіргені үшін айыппұлды төлеу мерзімі жолаушы өтініш берген күннен бастап 10 күнтізбелік күнмен шектеледі. Сондай-ақ тасымалдаушының кінәсінен қол жүгінің бүлінуі үшін өтемақы төлеу тәртібі енгізіледі.
Жануарларды ұшақ салонында тасымалдау. Үй жануарларын әуе компаниялары белгілейтін қағидаларға сәйкес ұшақ салонында алып жүруге рұқсат беру нормасы ресми түрде бекітіледі.
Еуразия24 пікірі:
Көлік министрлігі азаматтық авиация саласын жолаушылардың мүддесіне барынша бейімделген жүйеге айналдыруға бағытталған өзгерістер әзірлеп отыр. Бұл – құптарлық бастама. Қазіргі таңда рейстердің кешігуі, әуе кемесінің ауыстырылуы немесе багаждың бүлінуі сияқты даулы жағдайлардың көпшілігі жалпы нормалармен немесе әуе компанияларының ішкі қағидаларымен реттеледі. Мұндай жағдайлар көбіне тасымалдаушылар мен жолаушылар арасында келіспеушіліктердің туындауына себеп болады.
Біздің пайымдауымызша, мұндай мәселелер міндетті құқықтық нормаларда неғұрлым нақты айқындалған сайын, оларды әртүрлі түсіндіруге мүмкіндік те соғұрлым азая түседі.
Әсіресе, сыйымдылығы төмен әуе кемесіне ауысқан жағдайда әлеуметтік тұрғыдан осал санаттағы жолаушыларға басымдық беру туралы норманың енгізілуі маңызды. Осы уақытқа дейін овербукинг немесе әуе кемесін мәжбүрлі түрде ауыстыру кезінде жүкті әйелдерге, балалы отбасыларға, мүгедектігі бар адамдарға, ауыр науқас жолаушыларға және егде жастағы азаматтарға заң жүзінде кепілдендірілген артықшылық қарастырылмаған еді. Енді мемлекет ең алдымен осы санаттағы азаматтардың құқықтарын қорғауды заңнамалық деңгейде бекітуді ұсынып отыр.
Сондай-ақ багажды жеткізу кешіктірілген жағдайда өтемақы төлеудің нақты он күндік мерзімінің белгіленуі әуе тасымалдаушыларын жауапкершілікпен қарауға ынталандырады және жолаушылардың талап-арыздарын қарау мерзімінің апталарға, тіпті айларға созылып кетуіне жол бермеуге мүмкіндік береді.
Қол жүгінің бүлінгені үшін өтемақы төлеу және ұлттық музыкалық аспаптарды ұшақ салонында алып жүруге қатысты нормалардың енгізілуі де өзекті қадамдардың бірі.
Өйткені бұған дейін мұндай даулардың әрқайсысы жеке қаралып, қабылданған шешімдердің басым бөлігі жолаушылардың пайдасына шешіле бермейтін.
