Астана. 17 шілде. INTERFAX-ҚАЗАҚСТАН – Президент Қасым-Жомарт Тоқаев жұма күні Шанхайда өткен Жасанды интеллект жөніндегі дүниежүзілік конференцияда сөз сөйлеп, «Қазақстан – Қытай цифрлық көпірі» бастамасын іске қосуды ұсынды.
«Біз цифрлық сауданың дамуын ынталандыруға және “Бір белдеу, бір жол” бастамасы аясында цифрлық экономикаларды интеграциялаудың практикалық моделін қалыптастыруға бағытталған “Қазақстан – Қытай цифрлық көпірі” бастамасын іске қосуды ұсынамыз», – деді Тоқаев. Президенттің сөзін Ақорданың баспасөз қызметі келтірді.
Мемлекет басшысы жасанды интеллектіні өңдеу өнеркәсібі, тау-кен өндірісі, энергетика, ауыл шаруашылығы, денсаулық сақтау және су ресурстарын басқару сияқты салаларға қауіпсіз әрі ауқымды түрде енгізу үдерісін жеделдету қажеттігін атап өтті.
Президенттің пікірінше, жасанды интеллектіні реттеу саласындағы ұлттық тәсілдердің өзара үйлесімділігін қамтамасыз етудің де маңызы зор.
«Жасанды интеллект жүйелерін сынақтан өткізу мен сертификаттаудың ортақ стандарттарын қалыптастыру аса маңызды. Сондай-ақ киберқауіптер, дипфейктер, цифрлық алаяқтық және өзге де жаңа қатерлерді қоса алғанда, жасанды интеллектіні зиянды мақсатта пайдаланудан қорғайтын сенімді тетіктерді әзірлеуіміз қажет», – деді Президент.
Сонымен қатар Қасым-Жомарт Тоқаев Қытай Үкіметі Қазақстанның келесі жылды екі елде Жасанды интеллект саласындағы бірлескен бастамалар жылы деп жариялау жөніндегі ұсынысын қолдайды деген үміт білдірді.
