Астана. 17 шілде. INTERFAX-ҚАЗАҚСТАН – Президент Қасым-Жомарт Тоқаев Жасанды интеллект саласындағы ынтымақтастық жөніндегі дүниежүзілік ұйымның (WAICO) алғашқы отырысын Астанада өткізуді ұсынды.
«Жасанды интеллект саласындағы ынтымақтастық жөніндегі дүниежүзілік ұйымның алғашқы отырысын Астанада өткізу біз үшін үлкен мәртебе болар еді. Сондай-ақ Қазақстанда осы ұйымның Орталық Азия бойынша өңірлік өкілдігін орналастыруды ұсынамыз», – деді Тоқаев жұма күні Шанхайда өткен Жасанды интеллект жөніндегі дүниежүзілік конференцияда сөйлеген сөзінде. Президенттің сөзін Ақорданың баспасөз қызметі келтірді.
Мемлекет басшысы Қазақстанның Жасанды интеллект саласындағы ынтымақтастық жөніндегі дүниежүзілік ұйымның негізін қалаушы елдердің бірі екенін атап өтіп, Қытайдың осы маңызды халықаралық платформаны құрудағы жетекші рөліне жоғары баға беретінін айтты.
«Жуырда ғана құрылған бұл жаһандық ұйымның әлемдік жасанды интеллекттің болашағын айқындайтын жетекші халықаралық институтқа айналу үшін әлеуеті зор екеніне нық сенімдіміз», – деді Президент.
Жасанды интеллект саласындағы ынтымақтастық жөніндегі дүниежүзілік ұйым (WAICO) – Қытай Үкіметінің бастамасымен құрылған тәуелсіз халықаралық үкіметаралық ұйым. Оны құру туралы келісімге Жасанды интеллект жөніндегі дүниежүзілік конференция қарсаңында 29 мемлекет, оның ішінде Қазақстан, Ресей, Қытай, Пәкістан және Индонезия қол қойды.
