«Қазақстан мұнайы мен газы» басылымының хабарлауынша, Қара теңіздегі Каспий құбыр консорциумы (КҚК) терминалы арқылы мұнай жөнелтудің тоқтатылуына байланысты Қазақстан 22 шілдеде мұнай мен газ конденсатын өндіру көлемін қысқартқан. Бұл туралы Reuters агенттігі саладағы екі дереккөзге сілтеме жасап хабарлады. Қазақстан мұнайын экспорттаудың негізгі бағыты саналатын КҚК 21 шілдеде танкерлерге жасалған ұшқышсыз ұшу аппараттарының шабуылынан кейін шикізат қабылдауды тоқтатты. Дереккөздің мәліметінше, 22 шілдеде Қазақстандағы мұнай мен газ конденсатын өндіру көлемі тәулігіне 215,6 мың тоннаға (1,63 млн баррель) дейін төмендеген. Ал ай басынан бергі орташа тәуліктік көрсеткіш 274 мың тонна немесе 2,07 млн баррель болған. Сондай-ақ Теңіз кен орнындағы тәуліктік мұнай өндірісі 22 шілдеде 925 мың баррельден 406 мың баррельге дейін қысқарған.
Reuters агенттігінің сауалына Қазақстанның Энергетика министрлігі мен «Теңізшевройл» компаниясының баспасөз қызметі әзірге түсініктеме берген жоқ.
Қазақстан экспорттайтын мұнайдың 80 пайыздан астамы Каспий құбыр консорциумы арқылы тасымалданады. Оның басым бөлігі Теңіз, Қашаған және Қарашығанақ кен орындарынан жеткізіліп, Новороссийск маңындағы Южная Озереевка елді мекенінде орналасқан консорциум терминалында танкерлерге тиеледі.
Еуразия24 пікірі:
Мұнай бағасы барреліне 100 долларға дейін көтерілгенімен, Қазақстан үшін әзірге оның пайдасы аз. Каспий құбыр консорциумы (КҚК) терминалы маңындағы танкерлерге жасалған ұшқышсыз ұшу аппараттарының шабуылынан кейін қазақстандық мұнайды негізгі экспорттық бағыт арқылы жөнелту тоқтатылды. Оның салдары мұнай өндіру көлемінен-ақ байқала бастады. Бұл бірнеше танкердің кешігуімен ғана шектелетін жағдай емес. Егер негізгі экспорттық бағыт мұнай қабылдауды тоқтатса, өндірушілер өндіріс көлемін амалсыз қысқартуға мәжбүр болады. Өйткені өндірілген мұнайды шексіз сақтап отыру мүмкін емес. Қазіргі жағдайдың парадоксы да осында: мұнай бағасы өсіп, жоғары табыс табуға мүмкіндік туған сәтте өндірілген шикізатты тұтынушыларға жеткізу қиындап отыр. Бұл жағдай Қазақстан экономикасының экспорттың негізгі бөлігі бір ғана бағытқа тәуелді болған кезде қаншалықты осал екенін тағы бір мәрте көрсетті. Балама бағыттар болғанымен, олардың ешқайсысы қысқа мерзімде КҚК-ның өткізу мүмкіндігін толық алмастыра алмайды.
