Брюссель. 25 шілде. ИНТЕРФАКС – Бельгияда НАТО-ның Еуропадағы Біріккен қарулы күштерінің жоғарғы қолбасшылығының (SHAPE) штаб-пәтерінде тағылымдамадан өтіп жүрген әйел тыңшылық жасады деген күдікпен ұсталды. Бұл туралы сенбі күні RTBF телеарнасы хабарлады.
Бельгияның Федералдық прокуратурасының мәліметінше, Қытайдан шыққан, Канада азаматы болып саналатын күдікті үшінші бір мемлекеттің пайдасына тыңшылық жасады және қылмыстық ұйымға қатысы бар деген күдікке ілінген.
Тергеу деректеріне сәйкес, Монс қаласының маңында орналасқан SHAPE қауіпсіздік қызметі күдіктіге қатысты күмәнді жайттарды байқап, бұл туралы Бельгияның Барлау және қауіпсіздік бас басқармасына (SGRS) хабарлаған.
Осыдан кейін тыңшылық істеріне жауапты Федералдық прокуратураға ақпарат беріліп, тергеу Шарлеруа қаласының Федералдық сот полициясына тапсырылған. Күдіктіге тыңшылық және қылмыстық ұйымға қатысу баптары бойынша іс қозғалды.
Бейсенбі күні полиция күдіктінің үйінде және SHAPE штабындағы жұмыс орнында тінту жүргізді. Келесі күні тергеу судьясы оны қамауға алу туралы ордер шығарған.
RTBF мәліметінше, тергеу әлі жалғасып жатыр. Осыған байланысты Федералдық прокуратура тергеу мүддесіне сәйкес әзірге қосымша ақпарат жарияланбайтынын мәлімдеді.
