Мәскеу. 25 шілде. ИНТЕРФАКС – Ресей президенті Владимир Путин мен Қазақстан президенті Қасым-Жомарт Тоқаев сенбі күні Омбыда Қазақстан мен Ресейдің өңіраралық ынтымақтастығы XXII форумының пленарлық отырысы алдында жеке кездесу өткізеді. Бұл туралы Кремль хабарлады.
«Форумның пленарлық отырысы басталғанға дейін Владимир Путин мен Қасым-Жомарт Тоқаев жеке кездесу барысында Ресей мен Қазақстан арасындағы өзара ықпалдастықтың өзекті мәселелерін талқылайды», – делінген хабарламада.
Кремльдің мәліметінше, форумның негізгі тақырыбы – «Жаһандық логистикалық экожүйені қалыптастыру: Қазақстан–Ресей ынтымақтастығының жаңа көкжиектері».
Шараға екі елдің вице-премьерлері, министрліктер мен ведомстволардың басшылары, Ресей Федерациясы субъектілері мен Қазақстан облыстарының әкімдері, сондай-ақ парламенттер, бизнес және сарапшылық қауымдастық өкілдері қатысады.
Ал Қазақстан Президентінің баспасөз қызметі Қасым-Жомарт Тоқаевтың Омбыға Владимир Путиннің шақыруымен баратынын хабарлады.
«Мемлекет басшысы Қасым-Жомарт Тоқаев Ресей Федерациясының президенті Владимир Путиннің шақыруымен 25 шілдеде Қазақстан мен Ресейдің өңіраралық ынтымақтастығының XXII форумына қатысу үшін Омбы қаласына жұмыс сапарымен барады. Іс-шара аясында мемлекеттер басшыларының кездесуі жоспарланған», – делінген хабарламада.
Қазақстан мен Ресейдің өңіраралық ынтымақтастығының XXII форумы Омбы қаласында кеше басталды. Екі елдің өңіраралық форумдары 2003 жылдан бері тұрақты түрде өткізіліп келеді.
