Дубай. 26 шілде. ИНТЕРФАКС – Ливан премьер-министрі Науаф Салам жексенбі күні Бағдадқа ресми сапармен барды. Келіссөздердің негізгі тақырыптарының бірі – энергетика саласындағы ынтымақтастық, оның ішінде Ирактан Ливанға дейін мұнай құбырын тарту мүмкіндігі болмақ. Бұл туралы The National басылымы хабарлады.
Басылымның мәліметінше, Ирактағы мемлекеттік қызметкерлердің бірі келіссөздер барысында Сирия арқылы халықаралық нарықтарға ирак мұнайын жеткізуге жоспарланып отырған магистральдық құбырды Ливанға дейін ұзарту мүмкіндігі де қарастырылатынын айтқан.
Сондай-ақ тараптар Ливандағы электр станцияларына отын жеткізу мәселесін талқыламақ. Соңғы жылдары бұл ел экономика мен энергетика саласында күрделі дағдарысты бастан өткеріп келеді.
Науаф Саламды Бағдадтағы сапарында жоғары лауазымды делегация мүшелері ертіп жүр. Энергетикадан бөлек, келіссөздерде экономикалық әріптестікті дамыту және өңірлік тұрақтылық мәселелері де сөз болады деп күтілуде.
Ирак үкіметінің өкілінің айтуынша, Ирак премьер-министрі Әли әз-Зейди мен Науаф Салам екіжақты қарым-қатынасты кеңейту, сондай-ақ өңірлік және халықаралық ахуалды талқылайды.
The National басылымы Ирактың Киркук–Жейхан мұнай құбыры мен Ормуз бұғазына балама бағыттарды іздеп жатқанын атап өтті. Себебі бұл бағыттардағы жағдай әлі де тұрақсыз. Осыған байланысты Ирак мұнайын Сирия мен Ливан арқылы Жерорта теңізі жағалауына экспорттау мүмкіндігі талқылануда.
Бұған дейін шілде айында АҚШ-тың Түркиядағы елшісі әрі Сирия мен Ирак жөніндегі арнайы өкілі Том Баррак сириялық және ирактық ресми тұлғалармен кездесіп, Ирак мұнайын Ормуз бұғазын айналып өтіп, Сирия арқылы жеткізу мәселесін талқылаған болатын.
