Астана. 26 тамыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Құрылтайдың алғашқы сессиясын шақыру туралы Жарлыққа қол қойды.
«Қазақстан Республикасы Конституциясының 58-бабының 2-тармағына сәйкес қаулы етемін: бірінші шақырылымдағы Қазақстан Республикасы Құрылтайының бірінші сессиясы 2026 жылғы 28 тамызда сағат 11:00-де Астана қаласында шақырылсын», – делінген сәрсенбі күні Мемлекет басшысының сайтында жарияланған Жарлықта.
Жарлық қол қойылған күннен бастап күшіне енеді.
Бұған дейін хабарланғандай, 23 тамызда Қазақстанда жаңа бір палаталы парламент – Құрылтай депутаттарының сайлауы өтті.
Дауыс беру қорытындысы бойынша Құрылтайға өту үшін белгіленген 5 пайыздық межеден бес партия өтті. Олар – елдегі ең ірі «Әділет» партиясы, «Ауыл», Respublica, «Ақ жол» демократиялық партиясы және Жалпыұлттық социал-демократиялық партия.
Қазақстанның заң шығару билігін жүзеге асыратын жоғары өкілді органы – Құрылтай алғаш рет сайланды. Бұған дейін елде Мәжіліс пен Сенаттан тұратын екі палаталы Парламент жұмыс істеді.
Құрылтай құрамында 145 депутат бар. Олар бірыңғай жалпыұлттық сайлау округінде партиялық тізімдер бойынша пропорционалды жүйемен сайланды. Депутаттар жалпыға бірдей, тең және төте сайлау құқығы негізінде жасырын дауыс беру арқылы сайланды.
