Астана. 26 тамыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев дарынды балаларды ынталандыру тетіктерін кеңейтуді тапсырды.
«Осы оқу жылында дарынды балаларды ынталандыруға бағытталған қосымша шаралар қабылдауды тапсырдым. Енді ақшалай сыйақы олимпиадада үздік нәтиже көрсеткен оқушыларға ғана емес, ғылыми жобалар байқауында жеңіске жеткендерге де беріледі», – деді Тоқаев сәрсенбі күні педагогтердің республикалық тамыз конференциясының пленарлық отырысында.
Президент жаңа цифрлық дәуірде адами капитал ел дамуының басты қозғаушы күшіне айналып отырғанын атап өтті.
«Бұл – Қазақстанның мықты тұстарының бірі. Балаларымыз дарынды, әлемдік деңгейде жоғары бәсекеге қабілетті екенін көрсетіп жүр. Жуырда халықаралық зияткерлік олимпиадалардың жеңімпаздары Ақордаға келіп, лайықты марапаттарын алды», – деді Мемлекет басшысы.
Тоқаевтың айтуынша, озық технологияларды жастардың зияткерлік әлеуетімен ұштастыру қазірдің өзінде экономикаға елеулі нәтиже беріп отыр.
«Жаңа стартаптар құрылып, құны миллиард доллардан асқан алғашқы технологиялық компаниялар пайда болды. Бұл тәжірибені кеңінен тарату үшін білім беру саласы негізгі орын алатын инновациялық орта қалыптастыру қажет», – деді президент.
Осыған байланысты Цифрландыру және жасанды интеллект жылы аясында білім беру саласын басқарудың платформалық үлгісіне көшу басталды.
