ҚР Сыртқы істер министрлігі хабарлайды: «Біріккен Ұлттар Ұйымының Бас Ассамблеясы Қазақстан Республикасының бастамасымен әзірленген «Планетаны көгалдандырудың халықаралық күні» қарарын қабылдап, 22 сәуірді Планетаны көгалдандырудың халықаралық күні деп жариялады. Халықаралық күнді белгілеу туралы бастаманы Қазақстан Президенті Қасым-Жомарт Тоқаев 2025 жылғы қыркүйекте БҰҰ Бас Ассамблеясының 80-сессиясындағы жалпы пікірталас барысында ұсынған болатын. Қарарға әлемнің түрлі өңірінен 32 мемлекет бірлескен автор болды. Бұл бастаманың халықаралық қауымдастық үшін маңызы мен өзектілігін көрсетеді. Қарардың қабылдануы Қазақстанның жаһандық экологиялық мәселелерді шешуге және қоршаған ортаны қорғау, экожүйелерді қалпына келтіру, жасыл желек аумағын ұлғайту мен экологиялық мәдениетті қалыптастыру жолындағы халықаралық күш-жігерді біріктіруге қосып келе жатқан үлесінің жалғасы саналады. Құжат әлем халықтарының көгалдандыру мен табиғи экожүйелерді қалпына келтірудің маңызы туралы түсінігін кеңейтуге бағытталған. Сондай-ақ мемлекеттерді, БҰҰ жүйесіндегі құрылымдарды, халықаралық және өңірлік ұйымдарды, азаматтық қоғам мен өзге де мүдделі тараптарды осы бағыттағы іс-шаралар мен бастамаларды жүзеге асыруға үндейді».
Еуразия24 пікірі:
Бұл бастама алғашында халықаралық күнтізбедегі кезекті атаулы күн секілді көрінуі мүмкін. Алайда бұл бастаманың нақты мәні бар. Көгалдандыру қаланың көркін арттырумен ғана шектелмейді. Жасыл желек қаладағы ауа температурасын төмендетуге, ауаның сапасын жақсартуға, топырақтағы ылғалды сақтауға, жердің тозуына жол бермеуге және жалпы аумақтардың климат өзгерісіне төзімділігін арттыруға ықпал етеді.
Сондықтан арнайы халықаралық күннің белгіленуі экология мен көгалдандыру мәселесін қоғам мен мемлекет назарынан тыс қалдырмай, оған тұрақты түрде қайта оралуға мүмкіндік береді.
Қазақстан үшін ел ұсынған бастаманың халықаралық деңгейде қабылдануы — «жұмсақ күш» саясатының да сәтті көрінісі. Қазақстан халықаралық экологиялық мәселелерді талқылауға қатысумен шектелмей, өз бастамасына БҰҰ деңгейінде қолдау таба алды.
