ҚР Конституциялық соты хабарлайды: «Конституциялық сот белгілі бір лауазымдарды атқаруға өмір бойына тыйым салу нормасының Конституцияға сәйкестігін тексереді. Конституциялық сот Қазақстан Республикасы Қылмыстық кодексінің 50-бабы бірінші бөлігінің Конституцияға сәйкестігін тексеру туралы өтінішті іс жүргізуге қабылдады. Өтініш иесінің пікірінше, мемлекеттік қызметші болып саналмайтын және сыбайлас жемқорлық қылмысының арнаулы субъектісіне тән белгілері жоқ адамға белгілі бір лауазымдарды атқаруға өмір бойына тыйым салу әділдік, жауапкершіліктің мөлшерлестігі мен оны жеке даралау қағидаттарына қайшы келуі мүмкін. Сондай-ақ мұндай шектеу еңбек ету құқығы мен кәсіпті еркін таңдау құқығын шектеуі ықтимал. Өтінішті қарау қорытындысы Конституциялық соттың ресми сайты мен Telegram арнасында жарияланады».
Еуразия24 пікірі:
Конституция бойынша әркімнің еңбек етуге, қызмет пен кәсіп түрін еркін таңдауға құқығы бар. Ал бұл құқықтан мерзімсіз айыру жазаның салдарын адамның бүкіл өміріне созып, оның қоғамға қайта бейімделіп, қалыпты өмірге оралу мүмкіндігін шектейді. Біздің ойымызша, мемлекеттік қызметшілердің жағдайы бөлек. Олар ант қабылдайды әрі мемлекеттік билік өкілеттіктеріне ие. Сондықтан оларға белгілі бір лауазымдарды атқаруға өмір бойына тыйым салуды мемлекеттік институттарды қорғау талабымен байланыстыруға болады. Ал дәл осындай ең қатаң шектеуді арнайы мәртебесі жоқ адамдарға да қолдану құқықтық тұрғыдан шектен тыс шара секілді көрінеді. Оның үстіне Қазақстан қылмыстық заңнаманы ізгілендіру бағытын ұстанып келеді. Осы тұрғыдан алғанда, жаза адамды өмір бойы еңбек етіп, табыс табу мүмкіндігінен айырмауға тиіс. Әсіресе оның жасаған әрекеті мемлекеттік басқару негіздеріне қарсы бағытталмаған болса.
