БРЮССЕЛЬ. 5 қыркүйек. ИНТЕРФАКС — Запорожье атом электр станциясы (ЗАЭС) маңында «Феросплавная-1» резервтік электр желісін қалпына келтіру үшін атысты уақытша тоқтату режимі күшіне енді. Бұл туралы Атом энергиясы жөніндегі халықаралық агенттік (МАГАТЭ) хабарлады.
«МАГАТЭ бас директоры Рафаэль Гросси сенбі күні агенттіктің арағайындығымен тағы бір жергілікті бітім күшіне енгенін мәлімдеді. Ол ұзақ уақыт бойы істен шыққан сыртқы электрмен жабдықтау желісін қалпына келтіру үшін қажет. 20 тамызда Днепр өзенінің солтүстігіндегі әскери қимылдар салдарынан АЭС жұмыс істеп тұрған жалғыз «Феросплавная-1» желісінен ажырады», — делінген МАГАТЭ-нің X әлеуметтік желісіндегі хабарламасында.
Агенттік сол уақыттан бері станция жүйелерін салқындату үшін авариялық дизель генераторлары пайдаланылып келе жатқанын еске салды. Алайда отын қоры азайып барады. МАГАТЭ мәліметінше, электр қуатының толық үзілуіне жол бермеу үшін станцияға қосымша отын жеткізу немесе электр желісін қалпына келтіру қажет.
Бұл — Гроссидің арағайындығымен жасалған жетінші жергілікті бітім. Оның айтуынша, ядролық қауіпсіздікке байланысты оқиғалардың алдын алу үшін екі тарап та МАГАТЭ-мен өзара іс-қимыл жасап отыр.
Запорожье АЭС — Еуропадағы ең ірі атом электр станциясы. Онда ВВЭР-1000 үлгісіндегі алты энергоблок бар. Станция 2022 жылғы 11 қыркүйектен бері электр энергиясын өндірмейді. Қазір алты реактордың барлығы суық тоқтату режимінде.
Станция нысандары Ресейге тиесілі «Запорожская АЭС» федералдық мемлекеттік унитарлық кәсіпорнының құрамына енгізілген. Оператор — «Росэнергоатом» АҚ құрған «Запорожье АЭС-ін пайдаланушы ұйым» АҚ. «Росэнергоатом» «Росатом» мемлекеттік корпорациясының құрамына кіреді.
