АСТАНА. 10 қыркүйек. ИНТЕРФАКС-ҚАЗАҚСТАН – Президент Қасым-Жомарт Тоқаев әлемдегі ахуал тұрақсыз әрі болжап болмайтын сипат алған кезеңде түркі мемлекеттері өркендеген елдердің қатарында болу үшін батыл әрі жедел әрекет етуі қажет екенін айтты.
«Әлемдегі жағдай тұрақсыз әрі болжап болмайтын сипат алды. Соған қарамастан, барлық мемлекет үшін жаңа мүмкіндіктер ашылып отыр. Өркендеген, заман көшінен қалмайтын елдердің қатарында болғымыз келсе, батыл әрі жедел әрекет етуіміз керек», – деді Қасым-Жомарт Тоқаев бейсенбі күні Түркі мемлекеттері ұйымына (ТМҰ) мүше елдердің ішкі істер министрлерімен кездесуде.
Мемлекет басшысы тарихи тамыры, тілі мен дәстүрі жақын, мүддесі ортақ түркі елдерінің ынтымақтастығы жылдан-жылға нығайып келе жатқанын атап өтті.
«Түркі мемлекеттері ұйымы достығымызды нығайтуға зор үлес қосып келеді. Қазақстан осы беделді ұйыммен жан-жақты ықпалдастықты тереңдетуге баса мән береді. Ұйымға мүше мемлекеттер түрлі саладағы, соның ішінде күштік құрылымдар арасындағы байланысты кеңейтіп келеді. Осы тұрғыдан алғанда, ішкі істер министрлерінің кездесуі айрықша маңызға ие», – деді Президент.
Қасым-Жомарт Тоқаев кездесуге қатысушыларға Қазақстанда жүргізіліп жатқан өзгерістер туралы да айтты. Ол наурызда жалпыұлттық референдум өтіп, жаңа Конституция қабылданғанын, вице-президент лауазымы енгізіліп, Үкіметтің жаңа құрамы жұмысқа кіріскенін атап өтті.
Сонымен қатар Президент Қауіпсіздік кеңесінің аппараты құрылғанын хабарлады. Оның міндетіне жаһандық және ұлттық деңгейдегі өзекті мәселелерді жан-жақты талдау, сондай-ақ ұлттық қауіпсіздік саласындағы жұмысты үйлестіру кіреді. Мемлекет басшысы алдағы уақытта Халық кеңесі құрылатынын да айтты.
Кездесуге Әзербайжанның ішкі істер министрі Вилаят Эйвазов, Қырғызстанның ішкі істер министрі Ұлан Ниязбеков, Түркияның ішкі істер министрі Мұстафа Чифтчи, Өзбекстанның ішкі істер министрі Азиз Ташпулатов және Қазақстанның ішкі істер министрі Ержан Сәденов қатысты.
Түркі мемлекеттері ұйымына Әзербайжан, Қазақстан, Қырғызстан, Өзбекстан және Түркия мүше. Венгрия мен Түрікменстан бақылаушы мәртебесіне ие. Ұйымның штаб-пәтері Сьамбулда орналасқан.
