АСТАНА. 13 қыркүйек. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Нью-Делиде өтіп жатқан БРИКС саммиті аясында АҚШ президентінің Оңтүстік және Орталық Азия жөніндегі арнайы өкілі Серджио Горды қабылдады. Бұл туралы Ақорда мәлімдеді.
Кездесу басында Серджио Гор Мемлекет басшысына АҚШ президенті Дональд Трамптың Қазақстан Тәуелсіздігінің 35 жылдығына орай жолдаған жеке құттықтау хатын табыстады.
Қасым-Жомарт Тоқаев жылы лебізі үшін АҚШ президентіне алғыс айтып, Дональд Трампты Қазақстанға сапармен келуге шақырғанын тағы да растады.
Президент Қазақстан мен АҚШ арасындағы кеңейтілген стратегиялық әріптестік қарқынды дамып келе жатқанын атап өтіп, екіжақты байланысты одан әрі нығайтудың маңызына тоқталды.
«Қазір Майамиде өтетін G20 саммитіне қатысуға дайындалып жатырмын. Бұл екіжақты күн тәртібіндегі мәселелерді талқылауға жақсы мүмкіндік болады деп ойлаймын. Біз әдемі сөзден гөрі нақты іске, өзара ынтымақтастықты ілгерілететін практикалық қадамдарға басымдық береміз», – деді Қасым-Жомарт Тоқаев.
Серджио Гор Қазақстан мен АҚШ басшылары арасындағы тығыз әрі сенімді байланыстың арқасында екі елдің қарым-қатынасы бұрын-соңды болмаған жоғары деңгейге көтерілгенін айтты.
«Бүгінде елдеріміз арасындағы сауда-экономикалық байланыстар мен өзара ықпалдастық белсенді дамып келеді. Біздің президент Қазақстанмен және Орталық Азиямен әріптестікті нығайтуға ерекше мән береді», – деді АҚШ президентінің арнайы өкілі.
Кездесуде екі ел ынтымақтастығының бірқатар маңызды бағыты қаралды. Соның ішінде жасанды интеллект пен цифрландыру саласындағы бірлескен жұмысқа басымдық берілді.
Тараптар кездесуді қорытындылай келе, Қазақстан мен АҚШ арасындағы жан-жақты әріптестікті одан әрі кеңейтіп, екі елге де тиімді ынтымақтастықты жаңа деңгейге көтеруге ниетті екенін растады.
