БЕРЛИН. 14 қыркүйек. ИНТЕРФАКС – Германия билігі Еуроодақ экономикасының стратегиялық маңызы бар салаларының Қытайға тәуелділігін азайтуға бағытталған бірқатар шара әзірлеп жатыр. Бұл туралы Bloomberg дереккөздерге сілтеме жасап хабарлады.
Агенттік мәліметінше, Германия министрліктері Қытайға тәуелділіктен туындайтын негізгі тәуекелдерді саралап, оған қарсы қандай шара қолдануға болатынын қарастырып жатыр. Ұсыныстар қатарында жаңа кедендік баж енгізу, Қытаймен бірлескен кәсіпорын құру талабын белгілеу, инвестицияға бақылауды күшейту және экспортқа қойылатын шектеулерді қатаңдату бар.
Германия канцлерінің үкіметі бұл бастамаларды алдымен 14 қазанда министрлер кабинетінің мақұлдауына ұсынбақ. Одан кейін Берлин Еуроодақ елдерінің қолдауына ие болуды көздейді.
Дереккөздердің айтуынша, Германия бұл бағытта Франциямен бірлесіп жұмыс істеп жатыр. Қыркүйекте Қытаймен өтетін келіссөздер мен қазандағы ЕО саммиті қарсаңында Берлин мен Париж ортақ ұстаным әзірлеп, оны одаққа мүше мемлекеттерге ұсынуды жоспарлаған.
Bloomberg Германияның мұндай қадамға баруын Қытайға қатысты саясатының қатаңдай бастағанының белгісі деп бағалайды. Бұған дейін Берлин екі ел арасындағы сауда байланысының ауқымын және Германия экономикасының экспортқа тәуелділігін ескеріп, Бейжіңге қатысты шешімдерде барынша сақтық танытып келген.
Жоспарланған шаралардың бірі – Қытайға жасанды интеллект саласындағы озық технологиялар мен жартылай өткізгіш шығаруға қажетті жабдықтарды жеткізуге бақылауды күшейту. Берлин сондай-ақ Қытай компанияларының Германияға салатын инвестициясын қатаңырақ қадағалауды көздейді. Германиялық компаниялардың Қытайға инвестиция салуына да қосымша бақылау немесе шектеу енгізілуі мүмкін.
Бұдан бөлек, Германия билігі өнеркәсіп кәсіпорындарына қажетті шикізат пен материалдарды Қытайдан тыс елдерден жеткізудің балама жолдарын табуға немесе оларды ел ішінде өндіруге жағдай жасауды жоспарлап отыр. Bloomberg бұған вольфрам жеткізілімін мысал ретінде келтіреді.
Германия телекоммуникация саласында Қытайға тәуелділікті азайтуды бұған дейін-ақ бастаған. Байланыс операторлары 2026 жылдың соңына дейін 5G желілерінде Huawei Technologies және ZTE компанияларының аса маңызды жабдықтарын пайдалануды тоқтатуға тиіс. Бұл бағыттағы шектеулер алдағы уақытта да жалғасады.
Дереккөздердің мәліметінше, аталған шаралардың басым бөлігі Германияның экономикалық қауіпсіздік стратегиясына енгізіледі. Құжат биыл жыл соңына дейін жарияланбақ.
