Брюссель. 16 қыркүйек. ИНТЕРФАКС – Еурокомиссия төрағасы Урсула фон дер Ляйен Канада мен Еуропалық одақ арасындағы қарым-қатынасты жаңа деңгейге көтеріп, елге ЕО-ның қауымдастырылған мүшесі мәртебесін беруді ұсынды.
«Канадаға Еуропалық одақтың есігін ашып, оның алғашқы қауымдастырылған мүше атануына мүмкіндік беру үшін сіздермен бірлесіп жұмыс істегім келеді», – деді ол сәрсенбі күні Еуропарламентке жыл сайынғы жолдауында. Жиынға Канада Премьер-министрі Марк Карни де қатысты.
Фон дер Ляйен Еуроодақ пен Канаданың Украина, қорғаныс, шикізатпен қамтамасыз ету және жеткізу тізбектері мәселелерінде ұстанымдары ұқсас екенін атап өтті. Оның айтуынша, тараптар қорғаныс өнеркәсібіндегі байланысты тереңдетіп, Арктикада бірлескен ірі жобаларды қолға ала алады. Сондай-ақ технология және жасанды интеллектіні өндіріске енгізу салаларында ынтымақтастықты дамытуға мүмкіндік бар.
Бұған дейін Марк Карни АҚШ пен Қытайдың қысымына төтеп бере алатын «орта державалар» одағын құруды ұсынған. CBC телеарнасына берген сұхбатында ол Оттаваның Еуроодақпен түрлі бағыттағы ынтымақтастықты тереңдетуге ниетті екенін айтқан. Алайда Канаданың ЕО құрамына кіруі қарастырылып отырған жоқ.
Сонымен қатар Financial Times дереккөздерінің мәліметінше, Еуроодаққа мүше бірқатар ел Канада мен ЕО арасында «бұрын-соңды болмаған одақ» құру жөніндегі Карнидің бастамасын қолдауға асықпай отыр.
Ал Bloomberg дереккөздерінің айтуынша, Канада үшін әзірге ЕО-мен жасалған Кешенді экономикалық және сауда келісімін (CETA) ратификациялау негізгі басымдық болып қала береді. Еркін сауда туралы бұл келісімге 2016 жылы қол қойылғанымен, Еуропаның он елі оны әлі ратификацияламағандықтан, құжат толық күшіне енген жоқ.
