ҚР Оқу-ағарту министрлігі хабарлайды: «Қазақстан БҰҰ комитетіне балалардың құқықтарын қорғау саласында жүргізіліп жатқан жүйелі реформаларды таныстырды. Женевада БҰҰ-ның Бала құқықтары жөніндегі комитетінің 101-сессиясында Қазақстан Республикасының БҰҰ-ның Бала құқықтары туралы конвенциясының ережелерін орындауы жөніндегі бесінші және алтыншы кезеңдік баяндамалары қаралды. БҰҰ-ның Бала құқықтары жөніндегі комитеті мүшелерімен өткен диалог барысында қазақстандық делегация балалардың құқықтары мен әл-ауқатын қамтамасыз етудің ұлттық жүйесін одан әрі нығайтуға бағытталған негізгі заңнамалық және институционалдық өзгерістер туралы мәлімет берді. Қазақстан тарапы балаларға қатысты зорлық-зомбылықтың алдын алу, буллинг пен кибербуллингке қарсы іс-қимыл, психологиялық көмекті және «111» мемлекеттік байланыс орталығын дамыту бағытында қабылданып жатқан шараларды таныстырды. Сондай-ақ жетім балаларды отбасына орналастыру, инклюзивті білім беру, балалардың денсаулығын сақтау, олардың шешім қабылдауға қатысуы және цифрлық ортадағы құқықтарын қорғау мәселелері қаралды. Қазіргі уақытта жетім және ата-анасының қамқорлығынсыз қалған балалардың 82 пайызы отбасыларда тәрбиеленіп жатыр. «Біз үшін тиімділіктің басты өлшемі – әрбір баланың жағдайының іс жүзінде жақсаруы. Қазақстан мазмұнды диалогке және балалардың құқықтарын қорғаудың ұлттық жүйесін одан әрі дамытуға ашық», – деп атап өтті Жұлдыз Сүлейменова».
Еуразия24 пікірі:
БҰҰ комитеті әзірге қорытынды тұжырымдарын жариялаған жоқ, өйткені 101-сессия әлі аяқталған жоқ. Дегенмен 16 қыркүйекте Қазақстанмен өткен диалогтың қорытындысы бойынша БҰҰ-ның ресми шолуы жарияланды. Комитет Қазақстанның алдыңғы есепті қарау кезеңінен бері қол жеткізген ілгерілеуін атап өтті. Бала құқықтары туралы конвенция ережелерінің ұлттық заңнамаға енгізілуіне оң баға беріп, Бала құқықтары жөніндегі уәкіл институтының құрылуы мен 2026–2030 жылдарға арналған «Қазақстан балалары» стратегиялық бағдарламасының қабылдануын құптады. Комитет төрағасы Софи Киладзе Қазақстанның цифрландыру мен жасанды интеллектіні қолдану тәсіліне жеке тоқталды. Ол жаңа технологиялар ұсынатын мүмкіндіктерді одан әрі пайдалануға шақырып, сонымен бірге олардың ықтимал тәуекелдеріне барынша жауапкершілікпен қарау қажеттігін атап өтті. Жалпы, қазақстандық делегация мен Комитет арасындағы диалогты мінсіз тапсырылған емтихан деу қиын. Сарапшылар өңірлер арасындағы теңсіздік, балалардың құқықтарын қорғау институттарының ресурстық мүмкіндіктері, мемлекеттік органдар жұмысының үйлестірілуі, зорлық-зомбылық және цифрлық ортадағы қауіп-қатерлер жөнінде бірқатар күрделі сауал қойды. Дегенмен Қазақстан бұл мәселелерді сырттан еске салмай-ақ мойындап, елде балалар үшін барынша қолайлы әрі қауіпсіз орта қалыптастыруға күш салып келеді.
