Астана. 2 қазан. ИНТЕРФАКС-ҚАЗАҚСТАН – Президент Қасым-Жомарт Тоқаев Қазақстанды жасанды интеллектіні қауіпсіз дамыту мәселелері бойынша халықаралық диалог өткізетін алаң ретінде ұсынды.
«Қазақстан жасанды интеллектіні қауіпсіз әрі жауапкершілікпен дамытуды қолдайды. Осыған байланысты біз аталған мәселелер бойынша сындарлы халықаралық диалог алаңы болуға дайынбыз», – деді Тоқаев жұма күні Жасанды интеллектіні дамыту жөніндегі кеңестің отырысында.
Ол Қазақстанның Жасанды интеллектіні дамыту жөніндегі кеңесі өзінің іс жүзіндегі маңызын көрсетіп үлгергенін атап өтті.
«Сондықтан Кеңес мүшелерінен Қазақстанның осы саладағы халықаралық бастамасына қатысты нақты ұсыныстарды қысқа мерзімде әзірлеуді сұраймын. Біздің ортақ ұстанымымыз биыл желтоқсанда Майамиде өтетін G20 саммитінде таныстырылады», – деді Тоқаев.
Мемлекет басшысы жасанды интеллект технологияларын қауіпсіз әрі жауапкершілікпен дамытуға бағытталған «Вашингтон моделін» тағы да қолдайтынын білдірді.
Оның пікірінше, Вашингтонда қол қойылған бұл келісімді сарапшылар жан-жақты зерделегеннен кейін, мүдделі елдер оны жасанды интеллект саласында жаһандық деңгейде қолдануға болатын үлгі ретінде қарастыра алады.
«Меніңше, «Вашингтон моделі» БҰҰ аясындағы халықаралық келісімнің негізіне айналуы мүмкін», – деді Президент.
Бұған дейін АҚШ-тағы жасанды интеллект технологияларын әзірлейтін жетекші компаниялардың басшылары Ақ үйде ЖИ модельдеріне қатысты ішкі бақылауды күшейтуді көздейтін келісімге қол қойғаны хабарланған.
АҚШ Өкілдер палатасының спикері Майк Джонсон сол кезде құжатта ЖИ әзірлеушілеріне арналған бірқатар ерікті міндеттеме белгіленгенін мәлімдеді. Ал АҚШ президенті Дональд Трамп келісімді «конституцияға жақын» әрі «моральдық тұрғыдан міндеттейтін» құжат деп атап, онда саланың «өзін-өзі бақылау» тетігі қарастырылғанын айтқан.
Трамптың түсіндіруінше, құжат жасанды интеллект саласындағы инновацияларды шектемей, оны пайдаланушылар үшін қауіпсіз ету мақсатында индустрия көшбасшыларымен бірлесіп жұмыс істеуді көздейді.
