Саясаттанушы Данияр Әшімбаев мәлімдейді: «Бүгін Қорғаныс министрінің орынбасары болып Татьяна Савельева тағайындалды. Ол – тәжірибелі қаржыгер, ұзақ жыл бойы бюджет мәселелеріне жауапты қаржы вице-министрі қызметін атқарған, кейін Мәжілістің бюджет комитетін басқарған маман. Тамыз айында ғана жаңа Құрылтай депутаты атанған еді. Алайда Қорғаныс министрлігіндегі қаржы мен басқару тәртібін реттеу қажеттілігіне байланысты ол атқарушы билікке қайта оралды. (…) Өкінішке қарай, Қорғаныс министрлігі жемқорлық дауларына жиі ілігіп келді. Кей жылдары бірден бірнеше генерал қамауға алынған кездер де болды. Мәселелер мемлекеттік сатып алу, кадр саясаты, материалдық қамтамасыз ету секілді түрлі бағыттарды қамтыды. Осыған байланысты саяси басшылық бұл ведомствоға әр кезеңде тәжірибелі азаматтық басқарушыларды министр немесе экономика, цифрландыру және қорғаныс өнеркәсібіне жауапты орынбасар ретінде жіберіп отырды. Қазіргі жағдай Қорғаныс министрлігінде қайтадан қатаң әрі жүйелі шешімдер қажет екенін көрсетті. Татьяна Савельева сияқты тәжірибелі әрі принципшіл қаржыгерді осы ведомствоға жіберу – қазіргі жағдайда орынды шешім».
Еуразия24 пікірі:
Савельева – Қорғаныс министрлігіне жіберілген алғашқы әйел де, алғашқы қаржыгер де емес. 2001 жылы министрдің экономика және қаржы жөніндегі орынбасары қызметін Жаннат Ертілесова атқарды. Ол сол кезде армияны келісімшарт негізіндегі қызметке көшіру мәселелерімен айналысып, өкілеттіктерді нақты шектеу және жарғылық емес қарым-қатынастарға жол бермеу қажет екенін ашық айтқан. Алайда бұл қызметте бір жылға жетпей, сол 2001 жылы лауазымынан кетті.
Қазіргі тағайындаудың жөні бөлек. Татьяна Савельева ұзақ жылдар бойы Қаржы және Экономика министрліктерінде бюджет жоспарлау ісімен айналысты, 2016–2023 жылдары Қаржы вице-министрі болды. Демек, Қорғаныс министрлігінде ауқымды тексерулер жүріп жатқан тұста ведомствоға келген маман бюджет жүйесін жақсы меңгерген.
Оның тәжірибесі министрліктің ішкі қаржы тәртібін қайта қарап, қаражатты жоспарлау мен бақылау жүйесін күшейтуге мүмкіндік беруі мүмкін. Біздіңше, Мемлекет басшысының қорғаныс ведомствосына азаматтық саладағы тәжірибелі қаржыгерді жіберуінің мәні де осында.
