PROTENGE мәліметінше, «8–11 қазан аралығында Ресейдегі «Яндекс» компаниясының деректерді өңдеу орталықтарына ұшқышсыз ұшу аппараттарымен жасалған шабуылдар Қазақстандағы компания қызметтерінің жұмысына да әсер етті. (…) 11 қазанда тұрғындар такси шақыру, дайын ас пен азық-түлікке тапсырыс беру кезінде қиындықтарға тап болды.
Такси қызметінің серіктестері платформаның жұмысына қаншалықты тәуелді екенін шамамен есептеп көруге болады. Бұқаралық ақпарат құралдарында жарияланған Yandex Go деректеріне сүйенсек, 2025 жылдың қаңтар-қазан айларында Қазақстанда осы платформа арқылы жұмыс істейтін жүргізушілер мен таксопарктердің жалпы табысы 521,8 миллиард теңгеге жеткен. Бұл – компанияның Қазақстандағы такси серіктестерінің жиынтық табысына қатысты ашық жарияланған ең соңғы мәліметі.
Осы соманы 304 күнге, одан кейін 24 сағатқа бөлсек, әр күнтізбелік сағатқа шамамен 71,5 миллион теңгеден келеді.
Алайда бұл қазан айындағы ақаудан келген нақты шығын емес. Есеп тек 2025 жылғы такси қызметінің көрсеткіштеріне негізделген. Ал жүргізушілер мен таксопарктердің шынайы табысы тәуліктің қай мезгілі екеніне және тапсырыс санына қарай өзгеріп отырады. Компания әзірге болған оқиғаның егжей-тегжейін жариялаған жоқ».
Еуразия24 пікірі:
Қазан айында «Яндекс» қызметінің жұмысында болған ақау экономикалық шығынға әкелгені сөзсіз. Сонымен бірге бұл жағдай цифрлық қызметтер нарығындағы бірқатар мәселені айқындады. Нарықтағы бағаға елеулі ықпал ететін ірі компанияның қызметі тоқтаған жағдайда, бәсекелестер үшін қолайлы жағдай туындайды. «Яндекс» жұмысындағы іркіліс кезінде де осындай жағдай байқалды. Өзге такси қызметтері жол жүру ақысын бірден қымбаттатты.
Әлеуметтік желілер мен бұқаралық ақпарат құралдарында inDrive қызметінің баға саясаты кеңінен талқыланды. Аталған сервисте жол жүрудің орташа құны 2,5–3 есе өскен. Бұл тұрғындардың наразылығын туғызып, төтенше жағдайлар кезінде такси қызметінің бағасына шектеу қою туралы ұсыныстардың көбеюіне себеп болды.
Алайда Қазақстанда мұндай жағдай алғаш рет болып отырған жоқ. 2022 жылғы Қаңтар оқиғасы кезінде «Яндекс» қызметінің жолақыны қымбаттатқаны әлі есте. Сол уақытта Алматыда коменданттық сағаттың енгізілуіне байланысты қоғамдық көлік қозғалысында іркілістер болып, такси бағасы күрт көтерілген еді.
Осыған байланысты Бәсекелестікті қорғау агенттігі «Яндекс Такси» қызметіне қатысты тергеу жүргізе бастады. Екі жылға созылған тергеу нәтижесінде компания монополияға қарсы заңнама талаптарын сақтау жөніндегі ішкі бақылау тәртібін енгізді. Алайда қабылданған шаралардың қаншалықты нәтиже бергені әлі де сұрақ тудырады.
