Almaty Air Initiative қорының хабарлауынша, Алматы тұрғындарының 80 пайыздан астамы қала ауасының адам денсаулығына қауіпті екенін айтады. Ал басқа жаққа көшуді шындап ойластырып жүрген немесе көшуді жоспарлаған тұрғындардың үлесі 17 пайыздан 26 пайызға дейін өскен «Зерттеу әлеуметтанушы Серік Бейсембаевтың қатысуымен дайындалды. PwC Қазақстан компаниясы зерттеудің әдіснамалық және талдамалық мәселелеріне қатысты жекелеген ұсыныстары мен пікірлерін ақысыз негізде ұсынды. Сауалнамаға қатысқандардың 81 пайызы Алматыдағы ауаның ластануы денсаулыққа қауіпті деп есептейді. Былтыр бұл көрсеткіш 74 пайыз болған. Ал респонденттердің 63 пайызы қаладағы ауа сапасына қатты алаңдайтынын жеткізген. Көшуді ойластырып жүрген немесе нақты жоспарлаған тұрғындардың 57 пайызы мұндай шешімге келуінің басты себебі ретінде экологиялық ахуал мен ауа сапасының нашарлығын атаған. Қаладан көшуге ниеттілердің үлесі әсіресе 25–34 жас аралығындағы тұрғындар арасында жоғары. Олардың 40 пайызы басқа жаққа қоныс аударуды ойластырып жүр. Сонымен қатар көшуді қарастырып жүрген тұрғындардың жартысы ауа сапасы айтарлықтай жақсарған жағдайда Алматыда қалуға дайын екенін білдірген», – делінген қордың хабарламасында.
Еуразия24 пікірі:
Ақпараттан хабардар болған дұрыс, әрине. Алайда Алматыдағы ауа сапасына қатысты мәліметтер алаңдаушылық туғызады. Қала тұрғындары тыныстап жүрген ауаның жай-күйі де, оның көзге көрінетін ластануы да көңіл көншітпейді. Әсіресе Алматының жас мамандар, кәсіпкерлер мен студенттер көптеп келетін еліміздегі басты орталықтардың бірі болып отырғанын ескерсек, бұл мәселенің маңызы арта түседі.Қала билігі мегаполистің экологиялық жағдайын жақсарту үшін ешқандай шара қабылдамаса, жағдай бұдан да күрделі болар еді. Қазір Алматыда ауаның ластануын азайтуға бағытталған кешенді шаралар жүзеге асырылып жатыр. Жеке тұрғын үйлерді газдандыру деңгейі 99,4%-ға жетті. Сондай-ақ №2 және №3 жылу электр орталықтарын газға көшіру жұмыстары жүргізілуде.
Соған қарамастан, Алматыдағы ауаны ластайтын негізгі көз әлі де автокөлік болып отыр. 2024 жылы атмосфераға шығарылған зиянды заттардың шамамен 60%-ы көлік құралдарының үлесіне тиесілі болған.Дегенмен қабылданып жатқан шаралар мен олардың нақты нәтижесі екі бөлек мәселе. Сондықтан қала тұрғындарының экологиялық жағдайға көңілі толмай, ауасы таза өңірлерге көшуді ойластыруын түсінуге болады. Өйткені мұнда жеке мүддеден бұрын адам денсаулығы тұр.
