Қазақстан Республикасының Бас прокуратурасы хабарлауынша, Шымкентте прокуратураның араласуынан кейін 46 мыңнан астам оқушы оқулықпен қамтамасыз етілді. «Тексеру барысында қаладағы мемлекеттік мектептерге 170 мыңнан астам оқулық жетіспейтіні анықталды. Бұған қоса, тозығы жеткен, пайдалануға жарамсыз 110 мыңнан астам кітап табылған. Мектептердегі оқулық қорының шамамен 74%-ын, яғни 2 миллион данасын жаңарту қажет. Соңғы үш жылда оқушылар саны ескеріліп, кітап қорына түгендеу жүргізілмеген. Оқулықтар белгіленген мерзімде жаңартылмай, сатып алынған кітаптар мектептердің нақты сұранысын өтемеген. Мәселен, Н. Оңдасынов атындағы №38 мектеп-гимназия бесінші сынып оқушыларына ағылшын тілінен 293 оқулық сұратқанымен, небәрі 90 данасын алған. Соның салдарынан оқушыларға мұқабасы бүлінген, кейбір беттері жоқ, әбден тозған оқулықтар таратылған», – делінген ведомство хабарламасында.
Еуразия24 пікірі:
Біз еліміздің барлық өңірі мен елді мекеніндегі прокуратура органдарына осындай тексеру жүргізуді ұсынамыз. Тіпті қай өңірден де тозығы жеткен, пайдалануға жарамсыз оқулықтар табылатынына күмәніміз жоқ.
Өйткені әр өңір оқулық басып шығаруға арналған мемлекеттік тапсырысты жергілікті бюджет есебінен қаржыландырады. Демек, бұл мәселеге қатысты сауалдар ең алдымен өңірлік білім басқармаларына қойылуы тиіс.
Егер қандай да бір мектепте балаларға жыл сайын ескі-құсқы оқулықтар берілсе, жұртшылық прокуратураға мектеп кітапханаларын бір тексеріп шығатын уақыт жеткен жоқ па деген мәселе көтере алады. Шымкенттік ата-аналар да дәл осылай әрекет еткен болатын.
Айтпақшы, сол кезде қалалық білім басқармасы оқулықтарға уақытында тапсырыс бергенімен, жаңа оқу жылы басталғанша кітаптардың қалаға жеткізілмегені анықталды. Ал бұл – мемлекеттік тапсырысты орындаушылардың жауапкершілігі мен тәртібіне қатысты бөлек мәселе.
Біздің ойымызша, әр өңірдегі оқулықпен қамтамасыз ету жағдайы туралы мәліметтер ашық жариялануы қажет. Атап айтқанда, қанша қаражат бөлінгені, қанша оқулық сатып алынғаны, олардың жеткізілу мерзімі, есептен шығарылған және жаңасына ауыстырылған кітаптар саны, сондай-ақ әлі қанша оқулық жетіспейтіні жұртшылыққа қолжетімді болуы тиіс.
Бұған қоса, мектептердің жылдар бойы кітап қорын жаңартпауының және оқулық санын оқушылардың нақты санына сәйкестендірмеуінің себептері тексеріліп, оның қорытындысы бөлек жарияланғаны жөн. Әрине, мұндай олқылықтардың себептері анықталған жағдайда.
