*** Қазақстан Қырғызстанға азық-түлік, мұнай-химия және металлургия өнімдерін жеткізуді арттыруға дайын
Астана. 30 қазан. ИНТЕРФАКС-ҚАЗАҚСТАН – 2026 жылдың қаңтар–тамыз айларында Қазақстан мен Қырғызстан арасындағы өзара сауда көлемі 19%-дан астам өсіп, 1,75 млрд долларға жетті, деп хабарлады Қазақстан үкіметінің баспасөз қызметі.
2025 жылдың қорытындысы бойынша екі ел арасындағы тауар айналымы 33%-ға артып, 2,4 млрд долларды құрады. Бұған дейін Қазақстан мен Қырғызстан басшылары 2030 жылға қарай өзара сауда көлемін 3 млрд долларға жеткізу міндетін қойған болатын.
«Біз Қырғызстанға тамақ, химия, мұнай-химия және металлургия өнеркәсібі өнімдерін жеткізу көлемін арттыруға дайынбыз», – деді Қазақстанның сауда және интеграция министрі Арман Шаққалиев Бішкекте өткен екінші өңіраралық ынтымақтастық форумында.
Сондай-ақ екі ел арасындағы агроөнеркәсіп өнімдерінің саудасы 41,5%-ға өсіп, 500 млн доллардан асқаны хабарланды. Жол картасына сәйкес, Қазақстан Қырғызстанға жеткізілетін ауыл шаруашылығы өнімдерінің түрлері мен көлемін ұлғайтуды көздеп отыр. Олардың қатарында дәнді және майлы дақылдар, күнжара, күнбағыс майы, балмұздақ және басқа да өнімдер бар.
Көлік және транзит саласында теміржол және автомобиль көлігімен жүк тасымалдау көлемі артты. Қазіргі уақытта екі елдің ортақ шекарасында рұқсат құжаттарын электронды түрде алмасу жүйесі енгізілді. Олардың санын 5 мыңға дейін ұлғайту келісілді. Сондай-ақ сегіз автомобиль өткізу пунктін кезең-кезеңімен жаңғырту жұмыстары жүргізіліп жатыр. Әуе қатынасында тұрақты рейстер саны 19%-ға өсіп, аптасына 19 рейске жетті.
Өзара сауданы дамыту мақсатында Қазақстан мен Қырғызстан «Қарасу» және «Ақ-Тілек» өткізу пункттерінің маңында индустриялық сауда-логистикалық кешен салып жатыр. Жобаны жүзеге асыру үшін Қазақстанның Жамбыл облысындағы Қордай ауданынан жер телімі бөлініп, қажетті құжаттар әзірленуде. Сонымен қатар болашақ кешенді электр энергиясымен қамтамасыз ететін энергетикалық инфрақұрылымның құрылысы басталды.
