Астана. 10 қараша. ИНТЕРФАКС-ҚАЗАҚСТАН – Қазақстан президенті Қасым-Жомарт Тоқаев әдеби және мәдени мұраны цифрландыруды қамтитын қазақ тілінің ұлттық цифрлық деректер қорын құруды жеделдетуді тапсырды.
«Ең алдымен, қазақ тілінің ұлттық цифрлық деректер қорын құруымыз керек. Біз қазақ тілінің байлығы туралы жиі айтамыз. Бұл – сөзсіз ақиқат. Әдеби-мәдени мұрамыз да сан алуан. Алайда осы қазынаның едәуір бөлігі әлі күнге дейін толық әрі сапалы цифрланбаған», – деді Тоқаев сейсенбіде халықаралық «Қазақ тілі» қоғамының құрылтайында.
Президент бүгінде қазақ тілі озық технологиялар саласында кеңінен қолданылып, заман талабына сай дамып келе жатқанын атап өтті. Елде мемлекеттік тілде қызмет көрсететін көптеген цифрлық платформа табысты жұмыс істеп тұр.
«Әлемнің жетекші технологиялық компаниялары тіліміздің әлеуетін барған сайын мойындап келеді. Мәселен, OpenAI компаниясының зерттеуіне сәйкес, қазақ тілі соңғы үш жылда жасанды интеллект жүйелерінде қолданылу аясы қарқынды кеңейген тілдердің қатарына енді. Yandex мәліметінше, оның қосымшаларының бірін қазақ тілінде пайдаланатындар саны 2025 жылмен салыстырғанда 30 пайызға артқан. Сондай-ақ былтыр Google қазақ тілін Gemini тілдік моделіне қосты», – деді президент.
Ол мұның бәрі қазақ тілінің ғылыми әлеуетін нығайтуға бағытталған жүйелі шаралардың арқасында мүмкін болғанын атап өтті.
«Сондықтан кітапханалар мен қорларда сақтаулы қазақ тіліндегі кітаптар мен мерзімді басылымдарды, аудио және бейнежазбаларды, архив пен музей қорларын цифрландыру жұмысын жандандыру қажет. Халқымыздың баға жетпес мұрасы мен рухани байлығын қағаз жүзінде ғана емес, цифрлық форматта да сақтауымыз керек. Бұл келешек ұрпақтың игілігіне қызмет етеді», – деді мемлекет басшысы.
