Reuters хабарлайды: «Абу-Дабиде Ресей, Украина және АҚШ өкілдерінің ақпаннан бергі алғашқы үшжақты келіссөзі басталды. Тараптар қарулы қақтығысты тоқтату жолдарын талқылап жатыр. Вашингтон бейбіт келісімге қол жеткізу бағытында ілгерілеуге үмітті. Бұл келісім Еуропада жаңа қауіпсіздік жүйесін құруды да қамтуы мүмкін. АҚШ өкілі Джаред Кушнер кездесудің ашылуында екі тараппен алдын ала жүргізілген келіссөздер негізгі қайшылықтарды анықтап, келіспеушіліктерді азайтуға мүмкіндік бергенін мәлімдеді. Оның айтуынша, Дональд Трамп америкалық келіссөз жүргізушілерге соғысты аяқтап, екі елдің де дамуына жағдай жасайтын шешім табу үшін жұмысты күшейтуді тапсырған.
Украина делегациясының басшысы Рустем Умеров Киев үшін қауіпсіздік кепілдіктерін алу мен орнықты бейбітшілікке қол жеткізу маңызды екенін айтты. Ресей делегациясының жетекшісі Владимир Мединский Ресей мен Украина халықтарының мүддесіне сай бейбітшілікке қадам жасалады деген үмітін білдірді».
Еуразия24 пікірі:
Келіссөзден әзірге елеулі жаңалық жоқ. Кездесу 11 қарашада аяқталады. Дегенмен 10 қарашадағы мәліметтер негізінде бірнеше мәселені атап өтуге болады.Тараптардың тоғыз айлық үзілістен кейін қайта келіссөзге жиналуының өзі саяси тұрғыдан аса маңызды. Делегациялардың, әсіресе Ресей өкілдерінің құрамы соғыс қимылдарын тоқтатудың жалпы қағидаларымен қатар ықтимал келісімнің нақты әскери-саяси шарттарын талқылау жоспарланғанын аңғартады. Алайда, біздіңше, тараптардың ымыраға келуге дайын екеніне әлі де кепілдік жоқ.
Келіссөздің нәтижесі америкалық араағайындардың қаншалықты ілгерілеуге қол жеткізгеніне байланысты. Джаред Кушнер келіспеушіліктердің азайғанын айтқанымен, тараптардың нақты қай мәселеде ұстанымдары жақындағанын түсіндірмеді.Мәскеу аумаққа қатысты талаптарын сақтап отыр. Киев бұл талаптарды қабылдамай, қауіпсіздік кепілдіктерін талап етеді.
Мәскеу Украинадағы қақтығысты реттеу мәселесін бүкіл Еуропаның қауіпсіздігі жөніндегі ауқымды келісім аясында қарастыруды ұсынады. Бұл туралы Reuters Ресей делегациясындағы дереккөзге сүйеніп хабарлаған.Егер дереккөздің мәліметі расталса, келіссөзде әскери одақтардың болашағы, тараптардың өзара міндеттемелері және жаңа қақтығыстардың алдын алу тетіктері де қарастырылып жатыр деген қорытынды жасауға болады.
