Вашингтон, 14 шілде. АҚШ президенті Дональд Трамп Ресейдің Украина мәселесі бойынша ұстанымына көңілі толмайтынын мәлімдеді. Бұл туралы ол Ақ үйде НАТО Бас хатшысы Марк Рюттемен кездесу кезінде айтты.
Трамп журналисттердің сұрағына жауап бере отырып: «Біз қатты ренжіп отырмыз. Ресейге көңілім толмайды», – деді.
АҚШ басшысы Украинадағы дағдарыс жөніндегі әңгімені «басқа күнге» қалдыратынын айтып өтті. Алайда ол егер 50 күн ішінде бейбіт келісімге қол жеткізілмесе, Ресейге қатысты өте қатаң баж салығы енгізілетінін ескертті.
«Егер 50 күн ішінде мәмілеге қол жеткізілмесе өте қатаң тариф енгіземіз, Бұл – шамамен 100 пайыз көлеміндегі жанама тарифтер», – деп мәлімдеді АҚШ президенті.
АҚШ-тың НАТО жанындағы тұрақты өкілі Мэттью Уитакер кейінірек нақтылап өткендей, бұл екінші деңгейлі санкциялар, яғни Ресей мұнайын сатып алатын елдерге қарсы бағытталмақ.
«Екінші санкциялар ресейлік мұнайды импорттайтын мемлекеттерге баж салығын енгізуді көздейді», – деді ол Bloomberg агенттігіне берген түсініктемесінде.
Уитакердің айтуынша, мұндай елдердің қатарында Үндістан мен Қытай да бар.
