Дубай, 17 шілде. ИНТЕРФАКС – Ирактың шығысындағы Васитпровинциясының әкімшілік орталығы Кут қаласындағы супермаркетте болған өрттен қаза тапқандар саны 61 адамға жетті. Бұл туралы «Әл-Жазира» телеарнасы Ирак Ішкі істер министрлігіне сілтеме жасап хабарлады.
Ресми деректерге сәйкес, қазірдің өзінде 45 адам отқа оранған ғимараттан құтқарылып шығарылған. Алайда жоғалып кеткендер де бар, олардың нақтысаны әзірге жарияланған жоқ.
Телеарнаның хабарлауынша, апатқа қатысты тергеу амалдарының алғашқы нәтижелері алдағы 48 сағатта жарияланады.
Бұған дейін Васит провинциясының билігі 50 адамның қаза тапқанын хабарлаған болатын. Құрбандардың арасында әйелдер мен балалар бар.
Провинция губернаторы Мұхаммед әл-Маехтің айтуынша, өрттің шығу себептеріне байланысты тергеу басталып, сауда орталығының иесі мен ғимарат қожайынына қатысты қылмыстық іс қозғалды.
«Қаза болған жазықсыз жандардың жақындарына кінәлілердің ешқандай жеңілдікке ие болмайтынына кепілдік береміз», – деді ол.
Қайғылы жағдайға байланысты Васит провинциясында үш күндік аза тұту жарияланды.
