Вашингтон. 20 шілде. ИНТЕРФАКС-ҚАЗАҚСТАН – АҚШ президенті Дональд Трамп 2016 жылғы президенттік сайлаудың нәтижелерін жоққа шығару мақсатында экс-президент Барак Обама жалған ақпарат таратты деп мәлімдеді.
Truth Social әлеуметтік желісінде Трамп Fox News тілшісі Харрисон Филдстың Обаманың әрекеттерін әшкерелегені үшін алғыс білдіріп, АҚШ Ұлттық барлау қызметінің директоры Тулси Габбардтың жұмысына оң бағаберді.
«Fox News-тің жас әрі талантты журналисі Харрисон Филдс өте жақсы жұмыс атқарды. Сарапшылар тобы Обама мен сайлау нәтижелерін бұрмалауға қатысы бар адамдарды сотқа тартуды ұсынды – олар енді әшкереленді», – деп жазды Трамп.
Ол сөзін былай жалғастырды: «Тулси Габбардты құттықтаймын. Осы қарқында жалғастырыңыздар!»
Бұған дейін АҚШ Ұлттық барлау қызметі 2016 жылғы сайлаудан кейін Обама әкімшілігі Дональд Трамптың жеңісін жоққа шығару үшін оның Ресеймен байланысы бар деген жалған ақпарат таратқанын растайтын дәлелдер жариялаған болатын.
